Олон улсын хөдөлмөрчдийн баярын өдөр тохиож байгаа энэ өдрүүдэд Хятад улс Тавдугаар сарын 01-ний хөдөлмөрийн шагнал гардуулах ёслол зохион байгуулж хөдөлмөрч иргэддээ хүндэтгэл үзүүлэн, шагналын хур буулгалаа.
Ёслолын үеэр үйлдвэрийн ажилчид, хөдөө орон нутгийн ажилтан, мэргэжлийн техник зэрэг бүхий л салбарын шилдгүүдийн төлөөлөл болсон, ажил үйлсээ гарамгай гүйцэтгэсэн иргэдээ шагнасан ба шинэ эрчим хүч, интеграл хэлхээ, хиймэл оюун, квант холбоо, хүргэлтийн үйлчилгээ зэрэг шинэ салбарын хөдөлмөр эрхлэгчид, “14, 15 дахь таван жилийн төлөвлөгөө”-ний тэргүүлэх чиглэлүүд, түүнчлэн улсын томоохон төслүүд болон үйлдвэрийн ажилчдын багийн бүтцийг шинэчлэх зэрэг ажлуудад хувь нэмэр оруулсан шилдгүүдийг шагнасан байна. Түүнчлэн төрийн бус хэвшил, үндэсний цөөнх, нийгмийн шинэ давхаргын төлөөлөл өмнөх жилүүдээс нэмэгдэж, төлөөлөх чанар улам сайжирсан байна.
Хөдөлмөр гэмээнэ өнгө гэрэлтэй, хөдөлмөрч хүн бахархалтай. Байгаль эхийн бүтээн бий болгосон бүх зүйлээс гадна хүний хэрэгцээний бүхий л зүйлс хөдөлмөрөөр бүтээгдсэн. Хөдөлмөрийн үр шимээр хүн төрөлхтөн гайхамшигт нээлтүүдийг хийсээр, Нэгэн улс орон ч үе үеийн хөдөлмөрч хичээнгүй хүмүүсийн зүтгэлийн хариуд орчин цагийн хөгжлийг авчирсан. Малчин хүний нөр их хөдөлмөрийн үр дүнд буянт мал сүргийн тоо толгой өсч нэмэгдэнэ. Хятад улс дэлхийн хамгийн том үр тариа үйлдвэрлэгч орон, үр тарианы үйлдвэрлэлээрээ олон жил дараалан дэлхийд тэргүүлсээр ирсэн нь Хятадын тариаланч нарын байгаль цаг уурын эрсдэлт нөхцөлийг тооцоолж тариагаа тарьж, ургацаа бүрэн хураадаг болсон олон жилийн туршид хуримтлуулсан нөр их хөдөлмөрийн үр дүн юм.
Сайн сайхан зүйл хөдөлмөр чармайлтын үр дүнд бий болдог. Хүний мөрөөдөн зорьсон бүх юм хичээл зүтгэлийн үр дүнд бүтдэг биелдэг.
Орчин цагт хөдөлмөрийн салбарт шинэ хэлбэр, чиг хандлагууд гарч ирж, хүмүүст мөрөөдлөө биелүүлэх өргөн хүрээтэй боломжийг олгож байна. Хөдөлмөрийн хяналтыг илүү үр дүнтэй болгох, ажилчдын аюулгүй байдлын сүлжээг бэхжүүлэх, мэргэжлийн сургалт, боловсролыг салбарын хэрэгцээнд илүү нарийвчлалтай нийцүүлэх, ажилчдын урам зоригийг нэмэгдүүлэх, "хөдөлмөр бол гайхамшигтай" гэсэн нийтлэг ойлголтыг бий болгох нь Олон улсын хөдөлмөрчдийн баярын өдрийн хамгийн чухал зорилго байх болно.
Хөдөлмөрийг оюуны болон биеийн хүчний хөдөлмөр гэж ялган нэрлэж болно. Оюуны хөдөлмөр нь гарт баригдахгүй, зарим нь нүдэнд үзэгдэхгүй ч асар их үнэ цэнийг агуулж байдаг. Хөдөлмөр хүнийг бүтээдэг, мөн улс үндэсний аюулгүй байдал, нийгэм эдийн засгийн тогтвортой хөгжлийн үндэс суурь болсоор байна. Үүнд л хөдөлмөрийн утга учир оршино.
