Бид эрэгтэй эмэгтэй найзууд хамтдаа ажиллаж, хамт спортоор хичээллэж, аялж байхыг хараад гайхахаа больсон. Тэдний дунд заавал хайр дурлал байх албагүйг бид мэднэ. Эрэгтэй эмэгтэй хүмүүс сайн найзууд байж чаддаг, гэхдээ жинхэнэ сэтгэлээрээ холбогдсон анд нөхөр байж чаддаггүй. Тийм явдал байвал хамгийн ховор байдаг. 

 

386 эрчүүдээс “Эр эм 2 найзууд байж чаддаг уу?” гэж асуухад 75% нь чадна гэж боддог гэв. 

44 настай гэрлэсэн эр хэлэхдээ:

 

-Эмэгтэйчүүдтэй найз байхад илүү амар байдаг. Тэд надад илүү сайн зөвлөгөө өгч, ярилцахад амар байдаг. Залуустай ярилцахад үргэлж нэг нэгнийхээ дээр гарах гэж оролддог, цалин ажил төрөл гээд. Харин эмэгтэй хүн бол тийм биш.

30 настай эр хэлэхдээ:

 

-Надад маш олон эмэгтэй найзууд бий. Гэхдээ би хэт тачаангуй биш, энгийн нэгэн эмэгтэйчүүдтэй сайн найз болдог. Тэр нь дээр санагддаг л даа. Эмэгтэйчүүдтэй ярилцахад тэд намайг үнэхээр сайн ойлгодог. Надад хайр дурлал дээр эсвэл өөр асуудал гарахад би зөвлөгөө хүснэ.  Би ч гэсэн тэдэнд залуусын тухай, ямар нэгэн гоо сайхны, хувцаслалтын зөвлөгөө өгөхөд үргэлж нээлттэй ханддаг. Өөрөөр хэлбэл бие биедээ туслаад, хэн хэндээ ашигтай.

 

Харин 122 эмэгтэйгээс “Эр эм 2 найзууд байж чаддаг уу?” гэж асуухад 65% нь эрэгтэй найз бий, гэхдээ тийм ч сайн найзууд байж чаддаггүй гэж хариулжээ.

 

35 настай ганц бие эмэгтэй хэлэхдээ:

-Би хэд хэдэн жилээр найзалсан сайн эрэгтэй найзуудтай.

Бид үргэлж утсаар холбоотой байдаг. Бид ярилцаж суухдаа эмэгтэйчүүдийн адил хорвоогийн бүхий л зүйлийг базаж сайхан ярилцдаг.

Гэхдээ би бусад эмэгтэй найзуудтай байдаг шигээ байдаггүй. Нэг л өөр эрэгтэйчүүдийн чөлөөтэй нийгэмд байгаа юм шиг санагддаг.

 

28 настай бүсгүй хэлэхдээ :

- Гэр бүл нь сайн найзууд байхаас эхэлдэг гэж би боддог. Гэхдээ энэ ойлголт одоо хуучирсан байж болох л юм. Надад маш олон сайн эрэгтэй найзууд байгаа. Тэд надад амьдрах эрч хүч бэлэглэж, намайг дэмжиж, намайг сайн ойлгодог.  Магадгүй энэ нь эрэгтэй сайн найзтай байх нэгэн давуу тал гэж би бодож байна. Гэхдээ сэтгэл зүйн хувьд зөрчилддөг үе бий. Хэрвээ эрэгтэй найзтайгаа ямар нэгэн бэлгийн учир ургуулах юм бол найз гэх утгаа алдаж эхэлдэг.

 

Эдгээр 2 хүйсийн дунд нөхөрсөг харьцаа байж болох юм. Миний бодлоор 2 найз бие биенийхээ хил хязгаарыг зөв тавьж өгвөл сайн найзууд болж чадна гэж дүгнэлээ. Зарим тохиолдолд гэрлэлт нь нөхөрлөлийн том дайсан болох нь бий. Эхнэр/нөхөр нь сайн найз гэхэд итгэхгүй хардаж эхэлнэ. Үүнээс болж зарим сайхан нөхөрлөл тасардаг. 

Таны бодлоор эрэгтэй эмэгтэй хүмүүс сайн найзууд байж чадах уу?