ОХУ-ын ерөнхийлөгч Владимир Путин, Хойд Солонгосын удирдагч Ким Жон Ун нар 09-р сарын 13-ны өдөр Восток сансрын хөөргөлтийн төвд хэлэлцээ хийжээ.

   Мэдээлэлд өгүүлснээр хоёр тэргүүн хоёр орны төлөөлөгчид оролцсон өргөтгөсөн яриа хэлэлцээ, мөн ганцаарчилсан уулзалт хийж, дараа нь үдийн зоог барихдаа ярилцсан байна. Ким Жон Уны айлчлалд зориулж, Орос улс Путины хувийн нэрээр үдийн зоог барьжээ.

   Хоёр удирдагчийн уулзалт нийтдээ 6 цаг орчим үргэлжилжээ. Путин, Ким хоёр 4 цаг орчим шууд яриа хэлэлцээ хийж, мөн Восток сансрын төвд зочлох үеэрээ ярилцсан байна.

   Оросын Спутник агентлагийн мэдээлснээр, Ким Жон Ун Путинтэй Хойд Солонгос, Оросын стратеги, тактикийн хамтын ажиллагааны асуудлаар ярилцсан. Хойд Солонгос болон Оросын харилцааг хөгжүүлэх нь хоёр орны ашиг сонирхолд нийцэж байгаа бөгөөд Хойд Солонгос Оростой урт хугацааны харилцаагаа хөгжүүлэхэд бэлэн байна.

   Солонгосын төв цахилгаан мэдээллийн агентлаг 09-р сарын 14-нд мэдээлснээр Хойд Солонгосын дээд удирдагч Ким Жон Ун ОХУ-ын Ерөнхийлөгч Владимир Путиныг Хойд Солонгост айлчлахыг урьсан бөгөөд Путин урилгыг хүлээн авчээ.