Монгол Улсын Дорноговь аймгийн засаг дарга Энхтүвшин тэргүүтэй төлөөлөгчид 05-р сарын 06-нд Өвөр Монголын Шилийнгол аймгийн Шилийн хотод ажлын айлчлал хийлээ. Тэд 07-нд Шилийнгол ажил мэргэжлийн дээд сургууль, Өвөр Монголын Олон улсын монгол эмнэлгийн Шилийнгол дахь салбар эмнэлэг, Шилийнголын махны Дажуан-Юань ХК зэрэг байгууллагын ажил байдалтай танилцаж, хоёр тал боловсрол, эрүүл мэнд, хөдөө аж ахуйн салбарт харилцан туршлага солилцож, хамтын ажиллагаагаа эрчимжүүлэх тухай санал солилцжээ. 

Дорноговь аймгийн Эрүүл мэндийн газрын дарга Энхцэцэг: Дорноговь аймагт Аймгийн нэгдсэн эмнэлгээс гадна төрөлжсөн уламжлалт монгол эмнэлэг үйл ажиллагаа явуулж байна. Эдгээр эмнэлэг Өвөр Монголын Олон улсын монгол эмнэлгийн Шилийнгол дахь салбар эмнэлэгтэй харилцан эмч мэргэжилтэн солилцох, туршлага судлах, дадлагажуулах, цахимаар харилцах, зайн оношилгоо хийх зэрэг талаар хамтран ажиллах өргөн боломжтой гэжээ. 

Дорноговь аймгийн Мэргэжил сургалт үйлдвэрлэлийн төвийн дарга Адилбиш: Манай төв барилгын олон мэргэжлээр мэргэжлийн ажилтан бэлтгэдгээрээ онцлог юм. Шилийнгол ажил мэргэжлийн дээд сургуультай 2015 онд хамтын ажиллагааны гэрээ байгуулж, хоёр тал автомашин, гагнуур, цахилгаан, компьютер зэрэг чиглэлээр харилцан мэргэжлийн багш, оюутан солилцдог. Хойшид хоёр тал улам олон талаар хамтран ажиллах боломж нөхцөл нээгдэж байгаад сэтгэл хангалуун байна гэжээ.