Монгол Улс сансарт иргэнээ илгээсэн дэлхийн 10 дахь орон

2017-03-22 16:16

Өнөөдөр 2017 оны гуравдугаар сарын 22-ны өдөр. Монгол хүн анх сансарт ниссэний 36 жилийн ой тохиож байна. Энэ өдөр Монгол Улс, ЗХУ-ын баатар, Монгол Улсын иргэн сансрын нисэгч Ж.Гүррагчаа, Монгол Улс, ЗХУ-ын хошой баатар, ЗХУ-ын сансрын нисэгч В.А.Жанибековын хамтаар 1981 оны гуравдугаар сарын 22-ны өдөр Байконуур дахь сансрын хөлөг хөөргөх талбайгаас “Союз- 39” хөлгөөр хөөрсөн түүхтэй.

Тэд сансарт нийт найман өдрийн турш байж, дэлхийг нийт 124 удаа тойрч, гуравдугаар сарын 30-нд эх дэлхийдээ амжилттай газардсан юм. Энэхүү өдөр Монгол Улс сансрын уудамд сансрын судалгааны төхөөрөмж бүтээж, нислэгийн явцад ашигласан 20 дахь орон, сансарт иргэнээ илгээсэн дэлхийн 10 дахь орон болсон түүхэн өдөр юм.

Энэхүү 36 дахь жилийн ойн түүхэн үйл явдлыг тэмдэглэхээр “Аз жаргалтай хотын-Залуу зохион бүтээгч хүүхдүүд” өдөрлөгийг зохион байгууллаа. ШУА-Одон орон, геофизикийн хүрээлэн, Шинжлэх ухаан технологийн их сургуулийн Механик тээврийн сургууль болон Хүүхдийн урлан бүтээх төвтэй хамтран оюутнууд болон сурагчдын дунд “Танин мэдэхүйн богино илтгэлүүд” семинар зохион байгуулж, ШУТИС-МехТС, ХУБТөвийн оюутан сурагчдын бэлтгэсэн нисэх онгоц, сансрын хөлгийн загварууд бүтээснээрээ үзэсгэлэн байгууллаа. Мөн Сансар судлалын холбогдолтой сонин өвөрмөц цуглуулагч нарын бяцхан үзэсгэлэн, Пуужин нисэх хэрэгслийн агаарын үзүүлбэр тоглолт хэлбэрээр зохион явуулсан Зохион бүтээгч хүүхэд залуучуудын өдөрлөг боллоо.

Өдөрлөг Одон орон геофизикийн хүрээлэнгийн дэргэдэх Сансар Од Эрхэсийн ордонд болж байна.

Гэрэл зургийг Ц.ГАНБОЛД