Хятадын Төрийн зөвлөлийн ерөнхий сайд Ли Кэчян 04-р сарын 07-ны үдээс хойш Монгол улсын ерөнхий сайд Л.Оюун-Эрдэнийн урилгаар түүнтэй утсаар ярив.
    Ли Кэчян Хятад, Монголын харилцааг үнэлэхдээ:

- Талууд сайн хөршийн найрсаг харилцаа, эрх тэгш харилцан ашигтай байх зарчмын дагуу ажиллаж, стратегийн харилцаа холбоогоо гүнзгийрүүлж, ажил хэрэгч хамтын ажиллагаагаа бэхжүүлэн, ялангуяа цар тахлын эсрэг хамтын ажиллагаагаа эрчимжүүлж, хилийн боомтын бараа дамжин өнгөрөх хэмжээг түргэтгэн сэргээхийн тулд чармайж, томоохон төслийн хамтын ажиллагаа урагштай ахихыг баталгаажуулахад Хятадын тал бэлэн байна. Байгаль орчны асуудалд улс орны зааг хязгаар гэж үгүй, Монголын талтай байгаль орчны хамгаалалт, цөлжилтөөс сэргийлэх, цөлжилтийг засах зэрэг талаар идэвхтэй хамтран ажиллана гэж илэрхийллээ.

Өнөөдөр болоход Хятад улсын эдийн засаг бүхэлд нь сэргэх үндэс суурь тасралтгүй бэхжисээр байна. Хятадын эдийн засаг дэлхийн эдийн засагт гүнзгий нэвтэрсэн бөгөөд уялдан холбоолдсон.Үүний улмаас олон улсын эдийн засгийн төлөв байдлын өөрчлөлтийг бид цаашид нягт анхаарч, илүү таатай орчин бүрдүүлэн, зах зээлийн гол цогцын эрч хүчийг улам хөгжүүлж, Хятад улсын эдийн засаг зүй зохистой орон зайд тогтвортой байх, урт хугацаагаар сайжрахыг хадгалах болно. Энэ нь мөн Хятад, Монголын хамтын ажиллагааг өргөжүүлэх боломжийг олгож, хоёр орон, иргэдүүдэд илүү үр өгөөжөө өгнө гэдэгт би итгэж байна гэж Ли Кэчян онцолсон байна.
Л.Оюун-Эрдэнэ:

- Монголын тал Хятад улстай урт хугацааны сайн хөршийн найрсаг харилцаагаа хөгжүүлэхийг зорьж байгаа бөгөөд Хятадын талтай олон салбарын хамтын ажиллагаагаа гүнзгийрүүлж, Монгол, Хятадын иж бүрэн стратегийн түншийн харилцааны агуулгыг тасралтгүй баялаг болгоход бэлэн байна гэж хэллээ.