Хятад улс эрс эсэргүүцэж, удаа дараа хэлэлцээ хийсэн ч Литва улс 2021 оны арваннэгдүгээр сарын 18-нд Тайваний эрх баригчид "Литва дахь төлөөлөгчийн газар"-аа байгуулахыг зөвшөөрсөн байна. Энэ үйлдэл нь олон улсын хэмжээнд "нэг Хятад, нэг Тайвань"-ийг илт бий болгож, хоёр орны хооронд дипломат харилцаа тогтоох тухай албан мэдэгдэлд дурдсан Литвагийн улс төрийн амлалтаас няцаж, Хятадын бүрэн эрх, нутаг дэвсгэрийн бүрэн бүтэн байдалд халдаж, Хятадын дотоод хэрэгт бүдүүлгээр хөндлөнгөөс оролцсон байна. Хятадын тал үүнд ихээхэн дургүйцэж, эрс эсэргүүцэж байгаагаа илэрхийлж, Хятад, Литва хоёр орны дипломат харилцааг Хэргийг түр хамаарагчийн түвшинд хүртэл бууруулах шийдвэр гаргасан байна.

   Дэлхий дээр ганц Хятад улс байдаг. БНХАУ-ын засгийн газар нь бүхэл бүтэн Хятадыг төлөөлдөг цорын ганц хууль ёсны засгийн газар юм. Нэг Хятадын зарчим бол олон улсын хамтын нийгэмлэгийн нийтлэг ойлголт ба нийтээр хүлээн зөвшөөрсөн олон улсын харилцааны хэм хэмжээ юм, Басхүү Хятад, Литвагийн хоёр талт харилцааг хөгжүүлэх улс төрийн үндэс суурь юм. Хятадын засгийн газар Хятад, Литвагийн харилцааг хамгаалах сайн санааны үүднээс итгэл алдан урвах үйлдэл дахин хийхгүй байхыг Литвагийн талд удаа дараа анхааруулсаар ирсэн юм. Харамсалтай нь Хятадын засгийн газрын хатуу байр суурийг Литва үл тоомсорлож, хоёр талт харилцааны ерөнхий байдал болон олон улсын харилцааны үндсэн хэм хэмжээг санаандаа үл авч, Тайваний нэрээр Литвад "төлөөлөгчийн газар" байгуулахыг зориуд зөвшөөрч, олон улсын тавцанд таагүй байдал үүсгэсэн анхны жишээ болсон байна. Хятад, Литва хоёр улс Элчин сайдын түвшинд дипломат харилцаа тогтоож байсан улс төрийн үндэс суурь эвдэрсэн байдалд үндэслэж, Хятадын засгийн газар өөрийн бүрэн эрх болон олон улсын харилцааны үндсэн хэм хэмжээг хамгаалахын төлөө Хятад, Литва хоёр орны дипломат харилцааг бууруулаад хэргийг түр хамаарагчийн төвшинд хүргэх шаардлагатай болсон байна. Үүнээс үүдэн гарах бүх үр дагаврыг Литвийн засгийн газар эрхбиш хүлээх ёстой. Литвагийн тал алдаагаа нэн даруй засч, үндэсний бүрэн эрх, нутаг дэвсгэрийн бүрэн бүтэн байдлаа хамгаалах гэсэн Хятадын ард түмний хатуу шийдэмгий үзэл санаа болон хүчирхэг чадварыг дутуу үнэлж болохгүйг бид шаардаж байна.

   Тайвань хэзээ ч улс байгаагүй гэдгийг бид Тайваньд анхааруулсаар ирсэн юм. "Тайваний тусгаар тогтнол"-ын хүч бодит байдлыг хэрхэн гуйвуулж, хар цагааныг урвуулан ашигласан ч гэсэн эх газар, Тайвань нэг Хятадад харьяалагддаг гэсэн түүхэн үнэнийг өөрчилж чадахгүй юм. Гадныхнаар өөрийгөө хүндлүүлэх хэмээн оролдож, улс төрийн заль мэх гаргах нь эцэстээ заавал мухардалд орох болно.