“Үзэсгэлэнт Өвөр Монгол” хүүхдийн гар зургийн уралдаан

2017-06-01 23:44

Жил бүрийн Олон улсын Хүүхдийн эрхийг хамгаалах өдрийг тохиолдуулан ӨМӨЗО-ны Хөххотод суугаа Ерөнхий Консулын газар болон Өвөр Монгол дахь Монгол Улсын Иргэдийн Нийгэмлэгээс уламжлал болгон зохион явуулдаг хүүхдийн гар зургийн уралдаан VI удаа амжилттай болж өндөрлөлөө.

Энэ онд Өвөр Монголын Өөртөө Засах Орон байгуулагдсаны 70 жилийн ойд зориулан “Үзэсгэлэнт Өвөр Монгол” нэртэйгээр зарлагдсан бөгөөд нэг сарын хугацаанд орны өнцөг булан бүрээс нийт 420 гаруй хүүхдүүд бүтээлээ ирүүлснээрээ өмнөх жилүүдээс хамгийн олон бүтээл ирсэн, өргөн олон газар нутгуудыг хамарч чадсанаараа онцлог ач холбогдолтой боллоо. Тус гар зургийн уралдааны Шагнал гардуулах ёслол, Үзэсгэлэнгийн нээлтийн ёслолд ӨМӨЗО-ны Хөххотод суугаа Ерөнхий Консулын консул Д.Мөнх-Эрдэнэ, консул С.Ариунтуяа, дэд консул Б.Батзориг, Өвөр Монгол дахь Монгол Улсын Иргэдийн Нийгэмлэгийн тэргүүн МУСТА Ц.Бэрцэцэг, ӨМӨЗО-ны Ардын Засгийн Газрын Хэвлэл Мэдээллийн албаны дэд дарга Г.Баатар, Гадаад харилцааны газрын дарга Чяо Саньван, Газрын дарга Баянжаргал, Гадаад харилцааны газрын дэд дарга Л.Төмөрбагана, Гадаад харилцааны газрын ажилтан Ү Шяо Янь болон Хөххот Үндэстний Туршилтын сургуулийн удирдлага оролцлоо.

Ёслолд “Баатар” язгуур урлагийн сургуулийн “Уянгат жиргээ” найрал дууны анги, “Уран тагнай” монгол хэл боловсролын төвийн сурагчид, “Эзэн эгшиг” сургалтын төвийн сурагчид, авьяаслаг хүүхэд багачууд болон МУСТА, хөөмийч Б.Баянмөнх нар дуу хуураа өргөж урлагийн тоглолтоор бэлэг барьсан юм. Энэ жилээс эхлэн шилдэг багш нарыг шагнадаг болсон нь арга хэмжээний бас нэгэн онцлог боллоо. Үүнд, Баяннуур аймгийн Урадын дунд хошууны зургийн багш Гэрэлт, Монгол Улсын Боловсролын Тэргүүний ажилтан, уран бүтээлч Д.Гантөгс, Шилийнгол аймгийн Хөвөөт шар хошууны Нахиа сургуулийн зургийн багш Оюунаа нарыг тус тус шагнасан байна. Багш нарын шагналыг Эрээн хот дахь “Эгшиглэнт Монгол” оёдлын газар ивээн тэтгэсэн бөгөөд шилдэг багш нарт үндэсний хувцас хийлгэх эрхийн бичгээр шагнасан байна.