Хятадын гадаад худалдаа эхний найман сард тогтвортой өсөлттэй байна
Гаалийн ерөнхий газрын 09-р сарын 07-ны өдөр нийтэлсэн сүүлийн тоо баримтаас үзвэл, 2022 оны эхний 8 сард Хятадын импорт экспортын нийт хэмжээ 27 триллион 300 тэрбум юаньд хүрч, өнгөрсөн оны мөн үеийнхээс 10.1 хувиар өссөн байна. Үүнд, экспорт 15.48 их наяд юань болж, 14.2 хувиар өссөн бол импорт 11.82 их наяд юаньд хүрч, 5.2 хувиар өсжээ. Худалдааны ашиг 3.66 их наяд юаньд хүрч 58.2 хувиар өсөв. Гаалийн ерөнхий газрын Статистик, дүн шинжилгээний газрын дарга Ли Күйвэнь хэлэхдээ:
-Энэ он гарснаас хойш гадаад худалдааны хөгжлийн ээдрээтэй, хүнд нөхцөл байдалд Хятад улс цар тахлаас урьдчилан сэргийлэх, хяналт тавих, эдийн засаг, нийгмийн хөгжлийг үр дүнтэй зохицуулсан юм. Зах зээлийг тогтворжуулах, давуу талыг өргөжүүлэх, эрч хүчийг нэмэгдүүлэх, тогтвортой өсөлтийг хангах зорилгоор гадаад худалдааг тогтворжуулах цуврал бодлогыг тасралтгүй хэрэгжүүлж байна.
Гадаад худалдааны бүтэц, хөгжлийн чанар сайжрав
Энэ оны эхний найман сард Хятадын гадаад худалдааны цар хүрээ үргэлжлэн тэлж, гадаад худалдааны бүтэц, чанар ч дээшилсэн байна.
Ерөнхий худалдааны импорт, экспорт хоёр оронтой тоогоор нэмэгдэж, эзлэх хувь нэмэгдэв. Эхний 8 сард Хятад улсын нийт худалдааны импорт экспортын хэмжээ 17 триллион 550 тэрбум юаньд хүрч, 14.1 хувиар нэмэгдэж, гадаад худалдааны нийт үнийн дүнгийн 64.3 хувийг эзлэн, өнгөрсөн оны мөн үеийнхээс 2.3 пунктээр нэмэгдэв. Мөн хугацаанд боловсруулах худалдааны импорт экспортын хэмжээ 5 триллион 480 тэрбум юаньд хүрч, 3,5 хувиар нэмэгдэж, 20,1 хувьд хүрч, улсын баталгаат логистикийн импорт, экспортын хэмжээ 3.33 их наяд юань болж, 9 хувиар өссөн байна.
Механик болон цахилгаан бүтээгдэхүүн, хөдөлмөр их шаарддаг бүтээгдэхүүний экспорт нэмэгджээ. Эхний 8 сард Хятад улсын механик болон цахилгааны бүтээгдэхүүний экспорт 8 триллион 750 тэрбум юаньд хүрч, 9,8 хувиар нэмэгдэж, нийт экспортын үнийн дүнгийн 56,5 хувийг эзлэв. Үүний дотор автомат мэдээлэл боловсруулах төхөөрөмж, түүний эд анги 1.05 их наяд юаньд хүрч, 3.5 хувиар өссөн бол гар утас 555.39 тэрбум юаньд хүрч, 4.2 хувиар өсжээ. Автомашины үнэ 216.8 тэрбум юань болж, 57.6 хувиар өссөн бол хөдөлмөр их шаардсан бүтээгдэхүүний экспорт 2 триллион 810 тэрбум юаньд хүрч, 14,1 хувиар өссөн байна.
Бөөн барааны хувьд төмрийн хүдрийн импортын хэмжээ, үнэ буурч, түүхий тос, нүүрс, байгалийн хий, шар буурцгийн импортын хэмжээ буурсан байна. Хятад улс эхний найман сард 723 сая тонн төмрийн хүдэр импортолсон нь 3.1 хувиар буурч, импортын дундаж үнэ нэг тонн нь 827.8 юаньд хүрч, 29.4 хувиар буурсан байна. Мөн хугацаанд импортын түүхий нефтийн үнэ 330 сая тонн буюу 4.7 хувиар буурч, импортын дундаж үнэ 4792.1 юаньд хүрч, 56.8 хувиар өсөж, нүүрс 168 сая тоннд хүрч, 14.9 хувиар бууран, импортын дундаж үнэ 1021.3 юаньд хүрч, 81.2 хувиар өссөн байна. Сарын тоо баримтаас үзвэл, 08-р сард Хятад улсын импорт экспортын нийт хэмжээ 3.71 их наяд юаньд хүрч, 8.6 хувиар өссөн байна. Үүнд, экспорт 2.12 их наяд юаньд хүрч, 11.8 хувиар өсөж, импорт 1.59 их наяд юаньд хүрч, 4.6 хувиар өссөн бол худалдааны ашиг 535.91 тэрбум юаньд хүрч, 40.4 хувиар өссөн байна.
"Бүс ба зам" дагуу худалдаа эрчимтэй хөгжиж байна
Энэ оны эхний 8 сард Хятадаас АСЕАН, Европын холбоо, Америк зэрэг худалдааны гол түнш орнуудад хийсэн импорт экспортын хэмжээ өсөлтөд хүрэв. Үүнд, АСЕАН бол Хятадын худалдааны хамгийн том түнш бөгөөд Хятад, АСЕАН-ы худалдааны нийт хэмжээ 4.09 их наяд юаньд хүрч, 14 хувиар нэмэгдэж, гадаад худалдааны нийт үнийн дүнгийн 15 хувийг эзэлжээ. ЕХ бол Хятадын хоёр дахь том худалдааны түнш болох юм. Хятад, ЕХ-ны худалдааны нийт хэмжээ 3,75 их наяд юань болж, 9,5 хувиар нэмэгдэж, 13,7 хувийг эзэлсэн бол Хятад Америкийн худалдааны нийт хэмжээ 3,35 их наяд юаньд хүрч 10.1 хувиар нэмэгдэн, 12.3 хувийг эзэлсэн байна.
Үүний зэрэгцээ Хятад улс болон "Бүс ба зам"-ын дагуух орнуудын худалдааны солилцоо үргэлжлэн урагшилсаар байна. Ли Күйвэнь танилцуулахдаа "Сүүлийн жилүүдэд Хятад улс "Бүс ба зам" санаачилгыг чанарын өндөр түвшинд хөгжүүлэхийг гуйвшгүй ахиулж, тус замын дагуух улс орнуудтай худалдаа эрчимтэй хөгжиж байна. 8-р сард Хятадын "Бүс ба зам"-ын дагуух орнуудад хийсэн импорт экспортын хэмжээ өмнөх оны мөн үеийнхээс 23.8 хувиар нэмэгдэж, импорт экспортын нийт өсөлт 6.9 пунктээр нэмэгджээ".
Энэ оны нэгдүгээр сарын 01-нээс эхлэн бүс нутгийн эдийн засгийн иж бүрэн түншлэл (RCEP) хэрэгжиж, гадаад худалдааны компаниуд болон хэрэглэгчдэд ногдол ашиг авчирсан юм. Эхний 8 сарын гадаад худалдааны гүйцэтгэлээс харахад Хятадаас "Бүс ба зам"-ын дагуух орнуудад хийсэн импорт экспортын хэмжээ өмнөх оны мөн үеийнхээс 20.2 хувиар өсөж, RCEP-ийн бусад 14 гишүүн оронтой хийсэн худалдааны нийт хэмжээ өмнөх оны мөн үеийнхээс 7.5 хувиар өссөн байна. Хятадын Олон улсын худалдааг дэмжих зөвлөлийн тоо баримтаас үзвэл, 1-р сараас 8-р сар хүртэл, RCEP-ийн орнуудад экспорт хийсэн жижиг, дунд, бичил гадаад худалдааны аж ахуйн нэгжийн тоо өмнөх оны мөн үеэс 36.4 хувиар нэмэгджээ. Мөн хугацаанд, жижиг, дунд, бичил гадаад худалдааны аж ахуйн нэгжүүдийн экспортолсон RCEP бүсээс орлогын хэмжээ 2.79 хувиар өсөж, жижиг, дунд, бичил гадаад худалдааны аж ахуйн нэгжүүдэд RCEP-ийн худалдааг дэмжих нөлөө хурдацтай болов.
Импорт, экспортын 50 гаруй хувийг хувийн хэвшлийн аж ахуйн нэгж эзэлдэг
Гадаад худалдааны зах зээлд оролцогчдын эрч хүчийг чөлөөлөх нь аж ахуйн нэгжүүдэд туслах олон төрлийн тусламжийн бодлогыг хэрэгжүүлэхтэй салшгүй холбоотой юм. Үндэсний хөгжил, өөрчлөлтийн хорооны ерөнхий нарийн бичгийн даргын орлогч Ян Инькай хэлэхдээ:
- Энэ оны 05-р сараас эхлэн бүх бүс нутаг, хэлтсүүд эдийн засгийг тогтворжуулах багц бодлогын хэрэгжилтийг ахиулах ажлыг эрчимжүүлж, холбогдох дэмжих бодлого, нарийвчилсан хэрэгжилтийн дүрэм журам ба бодлогын үр нөлөөг гаргаснаар эдийн засаг сэргэж, гадаад худалдааны чиг хандлага, гадаад худалдааны уян хатан байдал үргэлжилсээр байна.
Энэ оны эхний найман сард Хятадын хувийн хэвшлийн аж ахуйн нэгжүүдийн импорт экспортын хэмжээ хурдацтай нэмэгдэж, эзлэх хувь нь нэмэгджээ. 01-ээс 08-р сард хувийн хэвшлийн аж ахуйн нэгжийн импорт экспортын хэмжээ 13 триллион 680 тэрбум юаньд хүрч, 14.9 хувиар нэмэгдэж, гадаад худалдааны нийт үнийн дүнгийн 50.1 хувийг эзэлж, өнгөрсөн оны мөн үеийнхээс 2.1 пунктээр нэмэгдэв. Мөн хугацаанд гадаадын хөрөнгө оруулалттай аж ахуйн нэгжүүд 9.17 их наяд юанийн импорт экспортолсон нь гадаад худалдааны нийт үнийн дүнгийн 33.6 хувийг эзэлжээ.
Ли Күйвэн хэлэхдээ:
- Энэ он гарснаас хойш гадаад орчны ээдрээтэй, байнга өөрчлөгдөж буй нөхцөлд хувийн хэвшлийн аж ахуйн нэгжүүд үйл ажиллагааны өндөр уян хатан байдал, зах зээлд дасан зохицох чадвар зэрэг давуу талаа ашиглан хүндрэлтэй тулгарч, хүндрэлийг даван туулж, гадаад худалдааны эрч хүч сайжрав. Эхний найман сарын байдлаар улсын хэмжээнд хувийн хэвшлийн аж ахуйн нэгжүүдийн импорт, экспортын өсөлт нийт өсөлтөөс 4.8 пунктээр илүү болжээ.
Гадаад худалдааны бодлогыг хэрхэн тогтворжуулах вэ? Худалдааны яамны туслах сайд Ли Фэй хэлэхдээ:
- Худалдааны яам хил дамнасан цахим худалдаа, зах зээлийн худалдан авалтын худалдааны арга зэрэг бизнесийн шинэ хэлбэр, загварыг эрчимтэй хөгжүүлж, шинэ эрчим хүчний машин зэрэг гол бүтээгдэхүүний экспортыг идэвхтэй дэмжин, гадаад худалдааны аж ахуйн нэгжүүдийн захиалга авах сувгийг жигдрүүлж, аж ахуйн нэгжүүдийг үзэсгэлэн худалдаанд оролцогчидтой болгожээ.
