Харбин хотын Инженерийн их сургуульд нэгэн онцгой охин суралцдаг аж. Өвөр Монгол охин Чинь Тинтин нь тус сургуулийн нэгдүгээр курсийн оюутан бөгөөд төрөлхийн булчингийн сулрал өвчтэй. Тиймээс багаасаа хоёр хөл дээрээ явах боломжгүй болсон ч эгэл жирийн, эрүүл оюутнуудын нэгэн адил тэдэнтэй мөр зэрэгцэн суралцаж, нөхөрлөж байна. Гэсэн ч энэ нь түүнийг энгийн хүнээс хэд дахин илүү хичээл зүтгэл гаргахад хүргэдэг байна.

Чинь Тинтин багаасаа бусад хүүхэдтэй адилгүй байв. Байсхийгээд л өвдчихдөг охиноо аав ээж нь байнга шахуу эмнэлгээр дагуулан явна. Харин 13 нас хүрсэн тэр жилээ Бээжин хотод төрөлхийн булчингийн сулрал өвчтэйгээ мэджээ. Энэ хүртэлх хугацаанд тэрбээр сурахаа зогсоогоогүй бөгөөд ирээдүйнхээ төлөө “Их сургуульд элсэнэ” хэмээн өөртөө амлажээ.

2018 онд тэрбээр Хайлаарын ахлах сургуулийнхаа шинжлэх ухааны чиглэлийн шилдэг сурагчаар шалгарч, Харбины Инженерийн их сургуулийн Материаллаг шинжлэх ухаан, химийн инженерийн сургуульд элсэн орсон байна. Охиноо асрахын тулд аав, ээж нь ч Өвөр Монголоос Харбинд нүүж иржээ. Сургуулиас нь тэдэнд амьдрах байр гаргаж өгсний зэрэгцээ Чинь Тинтинд зориулан аль болохоор хичээлүүдийг нь байрных нь нэг давхрын ангид оруулахаар зохицуулдаг аж.

Чинь Тинтин ч сурлагадаа сайн төдийгүй физикийн багш болох хүсэлтэй. Тэрээр “Алдарт эрдэмтэн Стивэн Хокинг шиг өөрийнхөө гэрлийг олох хүч надад бий. Хэдийгээр тэнгэр бурхан миний даль жигүүрийг мартсан ч миний мөрөөдлийг хорьж дийлэхгүй” хэмээн ярив.