ХКН-ын төв хорооны улс төрийн товчооны гишүүн, Гадаад хэргийн сайд Ван И Саудын Арабын Гадаад хэргийн сайд Файсалтай 10-р сарын 14-нд утсаар ярив.
Файсал хэлэхдээ "Саудын Араб Палестин, Израилийн өнөөгийн байдалд гүнээ санаа зовниж, энгийн иргэд рүү чиглэсэн бүх халдлагыг зэмлэн буруушааж, Израиль Газын иргэдийг бүс нутгаас гадуур хүчээр нүүлгэн шилжүүлэхийг эсэргүүцэж байна. Одоогоор Газын ард түмэнд хүмүүнлэгийн тусламжийг аль болох хурдан хүргэх шаардлагатай байна. Олон улсын хамтын нийгэмлэг мөргөлдөөнийг бусад улс орнуудад өргөжүүлэхгүйн тулд хамтран ажиллана гэдэгт найдаж байна. НҮБ-ын Аюулгүйн Зөвлөлийн холбогдох тогтоолыг хэрэгжүүлэхгүй, тусгаар тогтносон Палестин улс байгуулахгүй бол Палестины асуудлыг шударга, урт удаан хугацаанд шийдвэрлэх арга байхгүй гэж Саудын Араб үзэж байна. Хятад улс дэлхийн энх тайван, тогтвортой байдлыг ахиулахад чухал бөгөөд үндсэн үүрэг гүйцэтгэдэг.Саудын Араб Хятадтай хамт олон улсын хүмүүнлэгийн хуулийг дагаж мөрдөх, энгийн иргэдийг аюул ослоос хамгаалах, Палестины асуудлаарх Аюулгүйн зөвлөлийн холбогдох тогтоолыг хэрэгжүүлэхэд талуудад тус дөхөм үзүүлэхэд бэлэн байна" гэв.
Ван И хэлэхдээ "Хятад улс энгийн иргэдийг хохироосон аливаа үйлдлийг эсэргүүцэж, буруушааж байна. Учир нь энэ нь хүний үндсэн ухамсар, олон улсын харилцааны үндсэн хэм хэмжээг зөрчиж байна. Израилийн үйл ажиллагаа өөрийгөө хамгаалах хүрээнээс хэтэрсэн тул Газын ард түмнийг хамтын шийтгэлийг зогсоох тухай олон улсын хамтын нийгэмлэг болон НҮБ-ын ерөнхий нарийн бичгийн даргын уриалгыг анхааралтай сонсох хэрэгтэй. Бүх талууд нөхцөл байдлыг хурцатгах арга хэмжээ авахгүй, аль болох хурдан хэлэлцээрийн ширээнд суух ёстой. Хятад улс гал зогсоож, дайныг зогсоохын төлөө бүх талуудтай эрчимтэй харилцаж байна. Энгийн иргэдийн аюулгүй байдлыг хангах, хүмүүнлэгийн тусламжийн сувгийг аль болох хурдан нээж, Газын ард түмний үндсэн хэрэгцээг хангахын тулд бүх хүчин чармайлтаа гаргах нь нэн тэргүүний зорилт юм. Хятад улс Саудын Араб болон Арабын бусад орнуудтай хамтран ажиллаж, Палестины үндэсний эрх ашгийг сэргээх шударга үйлсийг үргэлжлүүлэн дэмжиж, Палестины асуудлыг "хоёр улсын шийдэл"-ийн зөв зам руу түлхэж, иж бүрэн, шударга, урт удаан хугацааны шийдэлд хүрэхэд бэлэн байна" гэжээ.
