Нээлтийн ёслолд Болор цомын эзэн яруу найрагч, доктор До.Болдхуяг, Болор цомын эзэн яруу найрагч Б.Галсансүх, Утга зохиол судлаач шүүмжлэгч, хэл бичгийн ухааны доктор Т.Батхуяг, доктор Ш.Баттөр болон монголын нэр хүндтэй зохиолч, яруу найрагчид, уран бүтээлчид оролцсон юм. Шинэ Мянган Утга Зохиолын Нэгдлээс хариуцан зохион байгуулсан энэхүү номын баярын үеэр "Харанхуйд цэнхэртэхүй" номыг монголын бүх сургууль, номын сангуудаар хүртээсэн байна. Энэ үеэр доктор Т.Батхуяг:  -Сүүлийн үед монголд кирил үсгээр Өвөр Монголын яруу найрагчдын бүтээл олноороо гарч байгаа. Түүнчлэн Өвөр Монголын яруу найрагчдын бүтээлийг монгол уншигчид сонирхон унших боломж нээгдэж байгаад олзуурхаж,  Өвөр Монголын яруу найргийн өнөөгийн хөгжлийг өндрөөр үнэлж буйгаа илэрхийллээ.Тэрээр мөн удахгүй Өвөр Монголын залуу яруу найрагчдын бүтээлийг эмхтгэн гаргахаар зэхэж байгаа юм байна. Дашрамд дурдахад, саяхан Болор цомын эзэн яруу найрагч, доктор До. Болдхуяг "Өвөр Монголын яруу найргийн дээжис" номын нээлтийг Интерном номын дэлгүүрт тэмдэглэсэн нь үүний адил монголын уншигчдад бас нэгэн шинэхэн бэлэг болсон юм.

                                                                               Бэлтгэсэн: Э.Үржинханд