Хоёр дахь удаагийн “Соёл иргэншлийн яриа хэлэлцээний олон улсын өдөр” тохиосон зургаадугаар сарын 10-нд Нью-Йорк, Парис, Вена зэрэг хотод байрлах НҮБ-ын байгууллагууд соёл иргэншлүүдийн харилцан солилцоо, харилцан суралцах асуудлаар цуврал арга хэмжээ зохион байгууллаа.

Нью-Йорк дахь НҮБ-ын төв байранд БНХАУ-аас НҮБ-д суугаа суурин төлөөлөгчийн газар тусгай сэдэвт арга хэмжээ зохион байгуулсан байна. НҮБ-ын Ерөнхий нарийн бичгийн дарга Антонио Гутерриш:

- Соёл иргэншлүүдийн яриа хэлэлцээгээр дамжуулан эв нэгдлийг бэхжүүлж, илүү шударга, энх тайван дэлхийг цогцлоохыг ахиулах ёстой гэж хэллээ.

Оролцогчид Хятадын дэвшүүлсэн Дэлхийн соёл иргэншлийн санаачилга болон соёл иргэншлийн яриа хэлэлцээг дэмжих чиглэлээр гаргаж буй хүчин чармайлтыг өндрөөр үнэлсэн байна.

Парис дахь НҮБ-ын Боловсрол, шинжлэх ухаан, соёлын байгууллагын төв байранд “Торгоны замын өв, аялал ба уламжлал: Соёл иргэншлийн яриа хэлэлцээний аялал” сэдэвт арга хэмжээ болов.

Оролцогчид “Торгоны зам” хөтөлбөр нь соёл иргэншлүүдийн харилцан солилцоо, харилцан суралцах үйл явцыг дэмжихэд чухал үүрэг гүйцэтгэж ирснийг өндрөөр үнэлж, яриа хэлэлцээгээр дамжуулан харилцан ойлголцол, итгэлцлийг бэхжүүлэхийг уриалжээ.

Вена хотод БНХАУ-аас Вена дахь олон улсын байгууллагуудад суугаа суурин төлөөлөгчийн газар болон НҮБ-ын Венийн салбар хамтран тусгай сэдэвт арга хэмжээ зохион байгуулсан байна.

Оролцогчид дэлхийн соёл иргэншлүүдийн яриа хэлэлцээг дэмжих чиглэлээр Хятадын гаргаж буй хүчин чармайлтыг сайшаасан бөгөөд “Соёл иргэншлийн цэцэгс дэлхий даяар хамтдаа дэлгэрнэ” сэдэвт дэлхийн улс орнуудын үндэсний цэцгийг дүрсэлсэн Хятадын уран зургийн үзэсгэлэн мөн нээлтээ хийлээ.

Үүнээс гадна БНХАУ-аас Нидерланд болон Кени улсад суугаа Элчин сайдын яамд холбогдох олон улсын байгууллагуудтай хамтран тэмдэглэлт арга хэмжээнүүд зохион байгуулсан байна.