Орон нутгийн цагаар 1-р сарын 19-нд Хятад улсын дарга Ши Жиньпиний тусгай төлөөлөгч, Хятад улсын дэд дарга Хань Жэн Вашингтонд АНУ-Хятадын Бизнесийн Зөвлөл, АНУ-ын Худалдааны Танхим зэрэг бизнесийн байгууллагуудын төлөөлөгчидтэй уулзжээ.
Хань Жэн хэлэхдээ, хэдэн өдрийн өмнө дарга Ши Жиньпин саяхан сонгогдсон ерөнхийлөгч Доналд Трамптай утсаар ярилцаж, Хятад-АНУ-ын харилцааны хөгжлийн талаар олон чухал зөвшилцөлд хүрчээ. Хятад, АНУ хоёр орон өргөн дэлгэр нийтлэг ашиг сонирхолтой бөгөөд хамтын ажиллагааны өргөн цар хүрээтэй юм. Хятад-АНУ-ын харилцаа сайн гараатай , тогтвортой хөгжиж байгаа нь Хятад, Америкийн ард түмний сайн сайхан ирээдүйн тухай нийслэг хүсэл эрмэлзэл, олон улсын хамтын нийгэмлэгийн хүлээлттэй нийцэж байна. АНУ-ын бизнесийн байгууллагууд үргэлж Хятад-АНУ-ын харилцааны үндэс суурь байсаар ирсэн бөгөөд Хятад-АНУ-ын эдийн засаг, худалдааны хамтын ажиллагаа, Хятадын шинэчлэл, нээлттэй байдлын оролцогч, гэрч, хувь нэмэр оруулагч, ашиг тусыг хүртэгч байсаар ирсэн. Хятад улс шинэчлэл, нээлттэй байдлаа цаашид өргөтгөж, бизнесийн орчноо үргэлжлүүлэн сайжруулах болно. АНУ-ын компаниуд Хятадад хөрөнгө оруулалт хийж, Хятадад хөл тавьж, гүүрийн үүрэг гүйцэтгэж, Хятад-АНУ-ын харилцааны эрүүл, тогтвортой хөгжилд илүү их хувь нэмэр оруулсаар байх болно гэдэгт найдаж байна.
АНУ-ын бизнесийн байгууллагуудын төлөөлөгчид хэлэхдээ, саяхан сонгогдсон ерөнхийлөгч Доналд Трамп, Хятад улсын дарга Ши Жиньпин хоёрын утсаар ярьсан нь гадаад ертөнцөд эерэг дохио өгсөн гэж үзэж байна. Дэлхийн хамгийн эрч хүчтэй, технологи хөгжсөн хоёр эдийн засгийн хувьд АНУ, Хятад хоёр орны харилцан ашигтай хамтын ажиллагаанд оролцож, бүтээлч, тогтвортой харилцах арга замыг олох ёстой. АНУ-ын бизнесийн байгууллагууд Хятадын эдийн засгийн ирээдүй, Хятад дахь хөгжлийн боломжуудад өөдрөг хандаж, харилцан яриа, хэлхээ холбоогоо бэхжүүлэхийг дэмжиж, хоёр талын харилцаа, эдийн засаг, худалдааны хамтын ажиллагааг тасралтгүй хөгжүүлэхэд дэмжлэг үзүүлж байна.
Мөн өдөр Хань Жэн Теслагийн гүйцэтгэх захирал Элон Масктай уулзав. Тэрээр хэлэхдээ, Теслаг багтаасан АНУ-ын компаниуд Хятадын хөгжлийн үр шимийг хуваалцаж, Хятад-АНУ-ын эдийн засаг, худалдааны харилцааг хөгжүүлэхэд шинэ, илүү их хувь нэмэр оруулах боломжийг ашиглах ёстой гэжээ.
Маск хэлэхдээ, Тесла Хятадтай хөрөнгө оруулалт, хамтын ажиллагаагаа гүнзгийрүүлж, АНУ, Хятад хоёр орны эдийн засаг, худалдааны солилцоог дэмжихэд эерэг үүрэг гүйцэтгэхэд бэлэн байна гэлээ.
