Дундад улсын нүүрсний хамгийн том олборлогч “China Shenhua Energy” корпорацийн цэвэр ашиг оны эхний хагаст 45.6 хувиар огцом буурсан байна. Ийнхүү энэ эхний хоёр улиралд өмнөх хагасын ашгийн тэн хагасыг шахуу алдаж цэвэр ашгийн хэмжээ 1.9 тэрбум орчим ам.доллартай тэнцэхүйц боллоо.

Тайлант хугацаанд компанийн борлуулалтын орлого өмнөх оны мөн үеэс 32.1 хувиар буурсан байна. Зөвхөн нүүрсний борлуулалтын орлого л гэхэд 2014 aaоны мөн үеэс 24.2 хувиар буурсан байгаа юм. “China Shenhua Energy” борлуулалт болоод нүүрсний үнэ буурсан гол шалтгааныг эрэлт талын нөлөөлөлтэй холбон тайлбарлаж байна. Түүнчлэн Дундад улсын засгийн газар утаагүй түлшийг дэмжих бодлого баримталснаар орлого буурах гол хүчин зүйл болжээ. Дундад улс одоогийн байдлаар нийт эрчим хүчний хэрэглээний 66 хувийг буюу гуравны хоёрыг нүүрснээс гаргаж авч байна. Энэ нь дэлхийн дундаж үзүүлэлтээс 35 хувиар дээгүүр түвшин болж байгаа юм. 2015 оны эхний дөрөвдүгээр сард Дундад улсын нүүрсний олборлолт 6.1 хувиар буурч, 1.15 тэрбум тонн болсон.

Дундад улсын нүүрсний гарц 2014 онд анх удаа буурсан нь сүүлийн бүтэн зуунд байгаагүй үзүүлэлт болж байсан юм. Дундад улсын эдийн засгийн өсөлт удааширч, засгийн газар агаарын бохирдлыг бууруулах, сэргээгдэх эрчим хүчний хэрэглээг дэмжих чиглэлд хөрөнгө оруулалт ихээр хийж байгаатай холбоотойгоор нүүрсний эрэлт огцом буураад байна.