09-р сарын 17-нд Аньхуй мужийн Хуаншань хотын Шэ шяний Шэньдү суурингийн Янчань тосгоны иргэд байшингийнхаа өмнө үр тариагаа хатааж байна.
09-р сарын 17-ны өдөр тариачид Ганьсү мужийн Жан Е хотын Ганьжөү дүүргийн Хэйхэ таны хатаалтын талбайд эрдэнэ шишээ хатааж байна.
Хүнань мужийн Хэнян хотын Хэнян шяний Күзүнчяо суурингийн Хуашань тосгонд өндрөөс доош харахад нэгэн гайхалтай “Тутарганы тариан талбайн зураг" харагддаг.
Ахиад л ургац хураах цаг ирлээ. Хятад улс 2018 оноос хойш “Намрын хугас”-ыг “Хятадын тариачдын ургац хураах баяр” болгон тэмдэглэж, мөн энэ нь тариаланчдад зориулсан үндэсний анхны баяр болсон юм. Өргөн уудам тариалангийн талбайн дундуур үхэр, хонин сүрэг бэлчиж, боловсорч гүйцсэн шар будааны анхилуун үнэр ханхлан, Хятадын ургац хураалтын үзэсгэлэнт дүр зураг харагдана.
Тариаланчид элбэг ургацаа тэмдэглэж байна
Саяхан Аньхүй мужийн Шюаньчэн хотын Жиндэ шяний Шинлун суурингийн Саньшань тосгонд "Уламжлалт тариалангийн дурсамжийг өвлөн үлдээж, ургац хураалтын баяр баясгаланг тэмдэглэе" сэдэвт намрын ургац хураалтын арга хэмжээ болсон юм. Тосгоныхон уламжлалт газар тариалангийн өвөрмөц арга барилыг үзүүлэв.
Хөгжилтэй нээлтийн ёслолын дараа туршлагатай тариаланчид тэргүүлж гартаа хадуур барин тариалангийн талбайд тариа будаагаа хадаж, тэдний хөдөлгөөн овсгоотой, чадварлаг байж, боодолтой тутаргануудыг уулын хяр дээр маш хурдан овоолов. Тосгоны найман иргэнийг дөрвөн бүлэгт хуваан ахлагчийн дуудлагын дагуу тэд чанга боосон тутарганы ишээ өндөрт өргөж, хувингийн дотор талд айзам хэмнэлтэй цохив.
Уламжлалт ургац хураалтын арга хэмжээд оролцсон тосгоны иргэн Жян Жиньшүй:
- Өнөө үед бид ургац хураахдаа машин ашиглаж байгаа нь хамаагүй хурдан, мөн хөдөлмөр бага зарцуулдаг боловч хүмүүс уламжлалт ургац хураалтын баяраа тэмдэглэхдээ уламжлалт ургац хураалтын зан үйлийг хийсээр байна гэж хэллээ.
Тариаланчид ургац хураалтаараа бахархаж, бүх Хятадын иргэд ургац хураалтын баяраа хөөр хөгжөөнтэй тэмдэглэж байна. Олон газар нутаг ургац хураалтын баярыг тэмдэглэж, олон төрлийн баяр ёслол, ололт амжилтыг харуулсан тариаланчдын шаргуу хөдөлмөрийг үнэлж байгаа юм.
Бээжинд болсон нэгэн томоохон арга хэмжээ нь ургац хураах баяр баясгаланг ардын урлагтай хослуулсан юм. Бээжингийн Тунжөү дүүргийн Юй Жяү олон улсын үрийн аж ахуйн үзэсгэлэнгийн төвд тусгай бүтээгдэхүүний үзэсгэлэн, хөдөө аж ахуйн шинжлэх ухааны үйл ажиллагаа, ухаалаг хөдөө аж ахуй, ухаалаг тоног төхөөрөмж, цахим худалдаа болон хөдөө аж ахуйд санхүүгийн дэмжлэг үзүүлэх, ургац хураах зах зээл зэрэг найман үзэсгэлэн нь ургац хураах гүн гүнзгий, бодит туршлагыг харуулсан байна.
Шанхай хотын ургацын баярын хэд хэдэн арга хэмжээ нь хөл хөдөлгөөнтэй боллоо. Тус арга хэмжээг дроноор агаараас бичлэг хийсэн байна. 09-р сарын 20-ноос 27-ны хооронд Жүжин суурингийн экологийн цэцэрлэгт хүрээлэнд "Шанхайн цэцэрлэгт хүрээлэнд ирж, ургац хураалтын багт наадмыг сайхан тэмдэглээрэй" сэдэвт найман өдрийн зах зохион байгуулагдаж, Шанхай хотын чансаатай хөдөө аж ахуйн бүтээгдэхүүн, хүнсний бүтээгдэхүүн, соёлын болон бүтээлч бүтээгдэхүүнүүдийг харуулсан байна. Мөн ургац хураалтын сэдэвтэй дрон гэрлийн шоу зохион байгуулж орчин үеийн технологи, урлагаар тариаланчдад хүндэтгэл үзүүлсэн байна.
Хайнан мужийн энэ жилийн Ургац хураалтын баярын гол газар нь Данжөү хотын Хайтөү амтат төмс орчин үеийн хөдөө аж ахуйн аж үйлдвэрийн паркад болж, "Хөдөө аж ахуй, хөдөө тосгон, тариаланчид"-ын ололт амжилтын үзэсгэлэн, Хөдөө аж ахуйн шөнийн зах, Биет бус соёлын өвийн үзэсгэлэн, Тариаланчдын хөгжөөнт спортын наадам зэрэг олон сонирхолтой арга хэмжээнүүд нь ургац хураалтын баярын сайн сайхан уур амьсгалыг бүрдүүлэв.
Элбэг ургац авчээ
Одоо бүх Хятадын олон газар нутаг намрын ургац хураалт явах их цар хэмжээтэй ажиллагаа явагдаж байна.
Есдүгээр сараас хойш Хар мөрөн мужийн зарим хэсэгт усан тутарга хурааж эхэлж, машин механикийн дуу хангинаж, хөл хөдөлгөөн ихтэй дүр зургийг бий болгосон юм.
ӨМӨЗО-ны Шилийнхотын аймгийн Баяншил бэлчээр, Аоюань сүүний фермийн төмсний талбайд төмс хураагч машинууд эмх цэгцтэй нааш цааш сүлжилдэж, хүржигнэх чимээн дунд төмөр анжис чийглэг хөрсийг хөдөлгөж төмс хураав. Талбайд тариаланчид хамтран ажиллаж, төмсөө хурдан ангилан, ачиж байна.
Шаньси мужийн Шиньжөү хотын Үжай шяний 4 мянган га талбайд чихэрлэг, наалдамхай эрдэнэ шиш нь мөн элбэг ургац авчээ.
Сычуань мужийн Чэндү хотын Чунжөү хотод саяхан 21 мянга га усан тутаргаа хурааж эхэлжээ. Намрын сэвшээ салхи өргөн уудам тутарганы тариан талбайгаар сэвэлзэхэд, алтан тариа давлагаалж, тариаланчид техникээ дайчилж, намрын ургац хураалтын ид өрнөв.
Үйлдвэрлэл, борлуулалт эрчимтэй хөгжиж, ургац арвин байна
Саяхан 2025 оны Хятадын тариачдын ургац хураалтын баяр, Алтан намрын хэрэглээний улирал болон Хэнань мужийн ядууралд нэрвэгдсэн бүс нутгуудад хэрэглэгчдийг дэмжих, үйлдвэрлэлийг зах зээлтэй холбох тусгай кампанит ажил Хэнань мужийн Жэнжөү хотод офлайн байдлаар зохион байгуулагдлаа. 500 орчим аж ахуйн нэгж оролцож, ядууралд нэрвэгдсэн бүс нутгаас гаралтай 10 мянга гаруй нэр төрлийн хөдөө аж ахуйн шилдэг бүтээгдэхүүнийг дэлгэн үзүүллээ.
Үзэсгэлэнгийн үеэр хэрэглэгчдийг дэмжих салбарын хэд хэдэн тэргүүлэгч компаниуд худалдан авагчидтай хамтран ажиллаж, гэрээ байгуулан, ядууралд нэрвэгдсэн бүс нутагт хөдөө аж ахуйн шилдэг бүтээгдэхүүн үйлдвэрлэх, борлуулах ажлыг нарийн зохион байгуулсан байна. Бөөнөөр худалдан авалт хийх, зогсоол дээр үзэсгэлэн худалдаанд оролцогчид нэг гартаа бүтээгдэхүүнээ, нөгөө гартаа гэрчилгээгээ хүлээж, урт дараалал үүсгэж байв. Үзэсгэлэнд оролцогчдын нэг:
- Энэ боломж үнэхээр үнэ цэнтэй юм. Хэдийгээр бид газар дээр нь хамтын ажиллагааны гэрээ байгуулж чадахгүй ч урт хугацааны харилцаа холбоо тогтоож, зах зээлийн илүү мэдээлэл олж авах нь үнэ цэнтэй юм гэж хэлэв.
Хятадын тариачдын ургац хураалтын баярын гол арга хэмжээний хувьд Хятадын тариачдын ургац хураалтын баярын 2025 оны Алтан намрын хэрэглээний улирал 09-р сард эхэлж, 11-р сарын сүүл хүртэл үргэлжилнэ. Энэ хугацаанд бүх газар орон, хэлтсүүд ургац хураалтыг тэмдэглэж, хэрэглээг сурталчлах олон салбар, олон шат дамжлагатай, олон талт арга хэмжээ зохион байгуулж, олон нийтийн хоолны ширээн дээр улам олон өндөр чанартай хөдөө аж ахуйн бүтээгдэхүүнийг авчрах болно. Энэ жилийн алтан намрын хэрэглээний улирлын үйл ажиллагаа нь "Хөдөө аж ахуйн ургац хураалтын баярыг тэмдэглэж, сайн сайхан амьдралыг бүтээе" уриан дор болж, цахим худалдааны зургаан алдартай платформ нь хөдөө аж ахуйн 25 арга хэмжээг эхлүүлэв. Үүнд хэрэглэгчийн татвар, дата дэмжлэг, төрөл бүрийн үйлчилгээ, нөөцийн дэмжлэг зэрэг багтсан. Мөн санхүүгийн найман байгууллага хөдөө аж ахуйг дэмжих 34 санаачилга гаргасан бөгөөд үүнд тусгай зээл олгох, худалдан авалтад хөнгөлөлт үзүүлэх, оноо авах зэрэг багтсан байна. Тяньжин, Шэньян, Үхань, Гуанжөү, Чэндү, Ланьжөү зэрэг 36 том, дунд хот хамтран "Ногооны сагс" бүтээгдэхүүний хэрэглээг дэмжих компанит ажил өрнүүлэв. Эдгээр бодит арга хэмжээ нь тариаланчид болон ард түмэнд үр өгөөжөө өгч, элбэг ургац авах, орлогоо нэмэгдүүлэхэд тусалсан юм.
Хөдөө аж ахуйн бүтээгдэхүүний хуваарилалт нь фермийг хоолны ширээтэй холбож, нийлүүлэлтийг оновчтой болгох, хэрэглээг өргөжүүлэхэд чухал үүрэг гүйцэтгэдэг. Олон жилийн турш алтан намрын хэрэглээний улирал нь хөдөө аж ахуйн бүтээгдэхүүний борлуулалтыг 130 тэрбум гаруй юаньд хүргэж чадсан байна.
