Хятад-Оросын бизнес форум 05-р сарын 23-нд Шанхай хотноо болж, ХКН-ын Төв хорооны Улс төрийн товчооны гишүүн, Төрийн зөвлөлийн дэд дарга Хэ Лифэн форумд оролцож, үг хэлэв.

Хэ Лифэн хэлэхдээ "Энэ оны 03-р сард дарга Ши Жиньпин ОХУ-д айлчилж, Ерөнхийлөгч Путинтэй Хятад-Оросын харилцааг хөгжүүлэх шинэ зураг төслийг хамтран боловсруулж, хоёр орны хамтын ажиллагааны шинэ чиглэлийг онцолжээ. Хоёр улсын төрийн тэргүүний стратегийн удирдлага дор Хятад-Оросын хамтын ажиллагаа нь хөгжлийн сайхан эрч хүчийг хадгалж, хоёр ард түмэнд бодит ашиг тусыг авчирч, хоёр талын хөгжил, сэргэлтэд байнгын түлхэц үзүүлж, дэлхийн хөгжил, дэвшилд чухал хувь нэмэр оруулж байна.

Хятад улс хоёр улсын төрийн тэргүүн нарын чухал зөвшилцлийг хэрэгжүүлэх, хоёр талын худалдааг өргөжүүлэх, чанарыг дээшлүүлэх, хөрөнгө оруулалтын хамтын ажиллагааг гүнзгийрүүлэх, уялдаа холбооны түвшинг дээшлүүлэх, аж үйлдвэрийн салбарын хамтын ажиллагааны чанарыг дээшлүүлэх, хөдөө аж ахуйн салбарын хамтын ажиллагааг бэхжүүлэх, Хятад-Оросын хамтын ажиллагааг тогтвортой хөгжүүлэхэд дэмжлэг үзүүлэхийн төлөө Орос улстай хамтран ажиллахад бэлэн байна.

Энэ жил Хятадын коммунист намын 20-р их хурлын үзэл санааг бүрэн дүүрэн хэрэгжүүлэх эхний жил юм. Хятад улс хятадын хэв маягийн шинэчлэлийг ямар ч эргэлзээгүй дэмжин, өндөр чанартай хөгжилд хүрэхийг эрмэлзэж, дээд хэмжээний нээлтийг өргөжүүлэх болно. Энэ жил дэлхийн бүх улс орон, тэр дундаа Орос улсад хөгжлийн шинэ боломж олгох юм. Хятад, Оросын бизнесийн нийгэмлэгүүд гүнзгий солилцоо хийж, Хятад-Оросын прагматик хамтын ажиллагааны шинэ бүлэг бичихэд гар нийлнэ гэдэгт найдаж байна" гэжээ.

ОХУ-ын ерөнхий сайд Мишустин форумд оролцож, илтгэл тавьжээ. Форум нээгдэхийн өмнө Хэ Лифэн ОХУ-ын ерөнхий сайдын орлогч Чернешенкотой уулзсан байна. ХКН-ын Төв хорооны Улс төрийн товчооны гишүүн, Шанхай хотын намын хорооны нарийн бичгийн дарга Чэнь Жинин холбогдох үйл ажиллагаанд оролцов.