Хятадын цагаачдын үндэсний удирдлагын товчооны хилийн шалгалт удирдлагын газрын дарга Лю Хайтао 03-р сарын 01-нд Төрийн Зөвлөлийн халдвараас нэгдсэн журмаар сэргийлэн хянах тухай хэвлэлийн бага хурал дээр хэлэхдээ: Халдвараас сэргийлэн хянах хугацаанд Хятадад байгаа гадаадын иргэдийн оршин суух хугацаа тулсан ч гэсэн автоматаар хоёр сар сунгагдах боломжтой, сунгасан хугацаанд дахин гар гүйцэтгэл хийх шаардлагагүй бөгөөд хуулийн дагуу Хятадад оршин суух юм уу хэвийн ёсоор хилээс гарч болно гэжээ.
Лю Хайтао хэлэхдээ: Эмчилгээгээр авран туслах, эм бэлдмэл судлан үйлдвэрлэх, эрдэм шинжилгээний харилцаа зэрэг халдвараас сэргийлэн халдвартай тэмцэж буй хүмүүсийн хувьд олон газрын хилийн удирдлагын байгууллагаас 24 цагийн турш яаралтай гэрчилгээ хийж өгөх үйлчилгээгээр хангах болно. Халдвараас сэргийлэн халдвартай тэмцэх талын харилцаа, хамтын ажиллагаа юм уу бизнес худалдаа болон шинжлэх ухаан судалгааны чухал ажиллагаанд оролцохоор Хятадад ирсэн гадаадын иргэн, мөн яаралтай хэргээр Хятадад ирж буйн улмаас виз авч амжаагүй гадаадын иргэдийн хувьд хил нэвтрэх боомтод очин виз авч болно гэжээ.
Түүнчлэн Лю Хайтао: Өдгөө халдвараас сэргийлэн хянах хугацаандаа байгаа болохоор хүмүүсийн хөдөлгөөн болон төвлөрлийг үр ашигтай багасгаж, харилцан халдварлах эрсдэлийг бууруулахын төлөө Цагаачдын үндэсний удирдлагын товчооноос "интернэт+захиргааны үйлчилгээ" хэмээх үйлчилгээний арга хэмжээг хэрэгжүүлж, Хятадад байгаа гадаадын иргэн Хятадын иргэнтэй нэгэн адилаар интернэтээр хүсэлт, илгээмжээ явуулж, хилээр нэвтрэх бодлого зохицуулалтын талаарх мэдээллийг цаг ямагт хүлээн авч болох юм гэжээ.
