2014 оны 9 дүгээр сарын 11-нд БНХАУ-ын дарга Ши Жиньпин Тажикстаны нийслэл Душанбе хотод анх удаа зохион байгуулагдсан Хятад, Монгол, Орос гурван орны төрийн тэргүүн нарын уулзалтын үед Хятад, Монгол, Оросын эдийн засгийн коридорын санаачилгыг гаргаж, Путин ерөнхийлөгч, Элбэгдорж ерөнхийлөгчийн идэвхтэй дэмжлэгийг авсан байна. 2016 оны 6 дугаар сарын 23-нд гурван улс албан ёсоор “Хятад, Монгол, Оросын эдийн засгийн коридор байгуулах хөтөлбөр”-т гарын үсэг зурж, энэ нь “Нэг бүс-Нэг зам” санаачилгын дор хийгдсэн анхны олон талт хамтын ажиллагааны төлөвлөгөөний хөтөлбөр билээ. Хятад, Монгол, Оросын эдийн засгийн коридор нь Торгоны замын эдийн засгийн бүсийн гол замналуудын нэг ба “Нэг бүс-Нэг зам” санаачилгын ОХУ-ны ЕвроАзийн эдийн засгийн холбоо ∕Euroasian Economic Union∕ санаачилга, Монгол улсын Талын зам санаачилатай уялдуулж, гурван улсын ажил хэрэгч хамтын ажиллагааг буй болгох, дээд түвшний яриа хэлэлцээний индэр болж, гурван талын бололцоо, давуу талыг ашиглан харилцан ашигтай, хамтын хожилтой эдийн засгийн хөгжлийн шинэ орон зайг буй болгон өргөжүүлж, бүс нутгийн эдийн засгийн интеграцлалыг ашиглан олон улсын зах зээлд гурван улсын хамтарсан өрсөлдөх чадварыг дээшлүүлнэ. Хятад, Монгол, Оросын эдийн засгийн коридор нь хоёр замтай. Нэгдүгээрт, хойд Хятадын Бээжин-Тяньжинь-Хэбэй ∕Beijing-Tianjin-Hebei Urban Agglomeration∕-гээс Хөх хот, цаашлаад Монгол улс болон ОХУ-д хүрнэ. Хоёрдугаарт, Далянь, Шень-ян, Чанчүнь, Харбинаас Манжуур болон ОХУ-ын Чита хүртэл байна. Энэхүү коридор нь доорх долоон томоохон чиглэлийн хамтын ажиллагааны хүрээнд анхаарал хандуулна. Үүнд зам тээврийн дэд бүтцийн бүтээн байгуулалтаа хөгжүүлэн талууд дэд бүтцээрээ харилцан холбогдох, боомтын бүтээн байгуулалт болон гааль, мэргэжлийн хяналтын байгууллагын хяналтыг сайжруулж, үйлдвэрлэлийн хүчин чадал болон хөрөнгө оруулалтын хамтын ажиллагааг өргөжүүлэх, эдийн засгийн хамтын ажиллагааг гүнзгийрүүлэх, хүмүүнлэгийн солилцоо хамтын ажиллагааг нэмэгдүүлэх, хүрээлэн буй орчны хамтын ажиллагааг сайжруулах болон орон нутгийн болон хил орчмын бүсийн хамтын ажиллагааг эрчимжүүлэх, тэр тусмаа зам тээврийн хүрээний хамтын ажиллагаа нь голлох үүрэг рольтой байхаар тодорхойлогдсон байна.