Бээжингийн 2022 оны өвлийн олимпын наадмын цанын төрлүүдийн тэмцээнүүд Бээжин хотын “Шөү Ган” цогцолборт зохиогдох юм. Бээжингийн хамгийн том гангийн үйлдвэр байгаад ашиглагдахаа больсон энэхүү районыг олимпын хотхон болгон засаж тохижуулсан нь ихээхэн онцлог бүтээн байгуулалт болсон билээ. Харин энэ сарын 13-ны өдөр Бээжин-2022 өвлийн олимпын бэлгэдлийн гал тус цогцолборт буухиалан очиход тэндэхийн 100 гаруй ажилтан болон Шижиншань дүүргийн оршин суугчдын төлөөлөл угтах ёслол зохион байгуулжээ. Ариун гал олимпын “Шөү Ган” цогцолборт удахгүй болох уралдаан тэмцээнийг гэрэлтүүлэх болно.
Бээжин-2022 оны өвлийн олимп ирэх хоёрдугаар сарын 04-нөөс 20-ны өдрүүдэд БНХАУ-ын нийслэл Бээжин хот болон Хэбэй мужийн Жанчхүү хотод болох юм. Бээжин дэх "Шувууны үүр" үндэсний цэнгэлдэх хүрээлэнд өвлийн олимпын нээлт, хаалтын ёслолын арга хэмжээ, "Мөсөн тууз" хэмээн нэрлэгддэг тэшүүрийн үндэсний төв ордонд олимп, паралимпын тэшүүртэй гүйлтийн тэмцээн зохиогдоно. Бээжингийн хойд хэсгийн алслагдсан дүүрэг Яньчинд олимпын хоёр шинэ ордон бүхий спортын их талбайг байгуулсан бөгөөд Уулын цанын үндэсний төв нь Хятад улсын хамгийн өндөр зэрэглэлийн тусгай замтай. “Цасан луу” хэмээгдсэн энэхүү чарганы замын нийт урт нь 1.9 километр, 16 хэсэг тахиралдсан хийцтэй бөгөөд техникийн хамгийн өндөр ур чадвар шаардсан байгууламж болжээ.
