Индонезын зүүн хэсгийн аялал жуулчлалын жижиг хот Лабуан Бажод хуралдсан АСЕАН-ы дээд хэмжээний 42 дахь уулзалт 05 дугаар сарын 11-ны өдөр өндөрлөжээ. Даргалагч орон Индонезын ерөнхийлөгч Жоко Видодо "Дээд хэмжээний уулзалт амжилттай боллоо. Эв нэгдлээ бататгахыг гишүүн орнуудад уриалж байна" гэжээ.

Дээд хэмжээний уулзалтын дараах хэвлэлийн хуралд Жоко Видодо "Эв нэгдэл бол АСЕАН хамтын зорилтдоо хүрэх, эдийн засгийн өсөлтийн төв болох, бүс нутгийн энх тайван, тогтвортой байдал, хөгжил дэвшилд маш чухал" хэмээн онцолжээ.

Энэ удаагийн уулзалтаар бүс нутгийн төлбөр тооцооны дэд бүтцийн түншлэл, үндэстэн дамнасан арилжаанд тухайн нутгийн валют ашиглаж банк санхүүгийн тогтвортой байдал, интеграцчлалыг нэмэгдүүлэх, цахилгаан хөдөлгүүрт автомашин ашиглах боломжийг бий болгох, эрчим хүчний шинэчлэлт, нүүрстөрөгчийн давхар ислийн ялгарлуулалтыг багасгах, АСЕАН-ы зохион байгуулах чадвар хийгээд байгууллагын үр ашгийг нэмэгдүүлэх зэрэг баримт бичиг гаргажээ.

АСЕАН-ы дээд хэмжээний уулзалт жилд хоёр удаа болдог.  43 дахь уулзалтыг энэ 9 дүгээр сард мөн Индонез улс зохион байгуулах юм байна.

АСЕАН нь 1967 онд байгуулагдсан бөгөөд Индонез, Тайланд, Сингапур, Филиппин, Бруней, Малайз, Вьетнам, Лаос, Камбож, Мьянмар гэсэн 10 гишүүн оронтой.