БНХАУ-ын ӨМӨЗО-ы Шилийнгол аймгийн Зүүн Үзэмчин хошууны ардын Х наадам болон “Дөрвөн цагийн Үзэмчин” соёл, аялал жуулчлалын наадам өнөөдөр буюу 2023 оны 07-р сарын 17-ны өдөр нээлтээ хийлээ.

   Энэ удаагийн ардын наадамд энэ цагийн өнгийг тодорхойлж, үзэгч олноо баясгаж яваа Өвөр Монголын Шилийнгол, Улаанхад, Хөлөнбуйр, Улаанцав зэрэг аймаг хотоос ирсэн аварга арслан, гарди, заан, харцага, начин цолтой 512 бөх уран мэхээ уралдуулах бол хурдан морины холын зайн 30 километр, эмээлтэй морины 15 километрийн уралдаан болон үрээ морины уралдаан, монгол шатрын тэмцээн, үндэсний уламжлалт сур харваа, монгол дээл хувцасны шалгаруулалт, Үзэмчин хувцас заслын үзүүлбэр, цагаан идээний наадам, Хятад-Монголын үзэсгэлэн худалдаа, соёл, аялал жуулчлал зэрэг маш өргөн хүрээний үйл ажиллагаа зохион байгуулагдаж байна.

   Наадмыг нээж ӨМӨЗО-ы Зүүн Үзэмчин хошууны Намын хорооны нарийн бичгийн дарга Хянган хэлсэн үгэндээ “Найр наадам бол Хятадын шилдэг уламжлалт соёлын охь бүтээл хийгээд онцгой уламжлалт соёл спортын арга хэмжээ юм. Мөн үндэстнүүдийн ард түмний эв нэгдэл, элэгсэг дотно алс ирээдүйгээ хамтдаа цогцлоох сайн сайхан хүсэл эрмэлзлийг тусгадаг. Наадмаар дамжуулан хөгжлийг ахиулж, хүчээ нягтруулан, нөхөрлөлөө зузаатгаж, Үзэмчин нутгийнхаа нэр алдрыг дуурьсгаж, тал нутгийн охид хөвгүүдийн эв нэгдэл, энэрэнгүй хайр, хүсэл мөрөөдлийг оргилуулж, Хятадын шилдэг уламжлалт соёлын өвөрмөц ид шидийг олон нийтэд түгээн дэлгэрүүлж чадна гэдэгтээ бид бат итгэлтэй байна” гэв.

   Зүүн Үзэмчин хошууны Ардын Засгийн газар жил бүр ардын наадмыг зохион байгуулж, хүн зоноо баярлуулахын зэрэгцээ "Дөрвөн цагийн Үзэмчин" соёл, аялал жуулчлалын брэндээ алдаршуулж, соёл, аялал жуулчлалаар дамжуулан эдийн засгаа өсгөхөд анхаарал хандуулж ирсэн бөгөөд энэхүү үр өгөөжтэй арга хэмжээ нь хошууны малчин түмний сайшаалыг хүртээд байна.