Нараар наадаж, хураар аргадсан наадмын өдрүүдэд Үзэмчин түмэн гайхамшигт соёл, ёс заншлын илэрхийлэл болсон монгол хувцсаараа гоёж, хүчит бөхөө барилдуулж, шандаст хурдан хүлэг морьдоо уралдуулж, мэргэн харваачдынхаа цэц мэргэнийг сорин сэтгэл тэнүүн бахархалтайгаар наадлаа.

    Дэнж хотойтол дэвэх хүчит 512 бөх уран мэхийг уралдуулан хүчээ үзсэнээс Баруун Үзэмчин хошууны бөх Цагаанзаан, Зүүн Үзэмчин хошууны бөх Түмэнбаяр, Зүүн Үзэмчин хошууны бөх Тал, Зүүн Үзэмчин хошууны бөх Бат-Оргил нар шөвгийн дөрөвт тунан үлдэж, Баруун Үзэмчин хошууны бөх Цагаанзаан түрүүллээ.

   Зүүн Үзэмчин хошуу нь “Хятадын шарга адууны өлгий нутаг” хэмээх сайхан алдартай бөгөөд адуун соёлыг өвлүүлэх, хөгжүүлэхэд ихээхэн ач холбогдол өгсөөр ирсэн. Тэгвэл энэ удаагийн наадамд 30 километрийн холын зайн уралдаанд 57 уяач хурдан хүлгээ уралдуулж, Баруун Сөнид хошууны уяач Тугчийн хурдан хүлэг түрүү, Зүүн Үзэмчин хошууны Эрдэнэбагана, Зүүн Үзэмчин хошууны Сайнбаяр нарын хурдан хүлэг удааллаа. 15 километрийн уралдаанд Улаанхад хотын Хишигтэн хошууны уяач Хүслэнгийн хурдан хүлэг түрүүлж, Тунляо хотын Зарууд хошууны уяач Цэцэнбаатарын хүлэг удаалав.

    Бахархалт үүх түүхийн соёлоороо наадамчин олноо баясгах Үзэмчин түмэнтэй ирэх жилийн дэлгэр цагаар дахин уулзахын ерөөл тавьж байна.