Баярын арга хэмжээнд Монгол улсын Их хурлын гишүүд, Засгийн газрын сайд нар, Төрийн болон Төрийн бус байгууллагын төлөөллийн 200 гаруй хүн оролцов.

     Арга хэмжээний эхэнд Хятадын уламжлалт цагаан сарын баяр, ХТРТ-ийн цагаан сарын концерт, 02-р сард Хятадын Харбин хотод зохиогдох гэж буй Азийн өвлийн наадмыг видеогоор танилцуулж, луу арслантай бүжгийн үзүүлбэр үзүүлэн, БНХАУ-аас Монгол улсад суугаа Онц бөгөөд бүрэн эрхт элчин сайд, хатагтай Шэнь Миньжуань, Монгол улсын Их хурлын дэд дарга, УИХ дахь Монгол-Хятадын парламентын бүлгийн дарга, хатагтай Х.Булгантуяа нар луу арслангийн мэлмийг нээлээ.

     БНХАУ-аас Монгол улсад суугаа Онц бөгөөд бүрэн эрхт элчин сайд, хатагтай Шэнь Миньжуань арга хэмжээг нээж, Цагаан сарын баяр бол Хятадын хамгийн эртний, хамгийн нижгэр, хамгийн чухал уламжлалт баяр бөгөөд Хятадын ард түмэнд гэр бүлийн эе эв, амар амгалан, аз жаргалыг мөрөөдөж, улс орны энх тайван, хүн байгаль хоорондын эе зохистой харилцааны итгэл найдварыг бүтээдэг учир дэлхий даяар улам бүр хүлээн зөвшөөрөгдөж, НҮБ-ын тэмдэглэлт өдөр болж, биет бус соёлын өвд бүртгэгдээд байна. “Хятадын цагаан сарын баяр” улам бүр “Дэлхийн цагаан сарын баяр” болж, дэлхийн бүх улс орны хүмүүсийн Хятад Улс, Хятадын уламжлалт соёлыг танин мэдэх чухал цонх болж, соёл иргэншлийн солилцоо, хүн төрөлхтний  хөгжил дэвшлийг ахиулж байна. Ши Жиньпин даргын дэвшүүлсэн Дэлхийн соёл иргэншлийн санаачилга нь мөн ийм ач холбогдолтой юм гэж илэрхийллээ.

     Монгол улсын Их хурлын дэд дарга, УИХ дахь Монгол-Хятадын парламентын бүлгийн дарга, хатагтай Х.Булгантуяа Хятадын уламжлалт цагаан сарын баярын мэндийг дэвшүүлэхдээ:

      - Өнгөрөн одож буй луу жилд Монгол, Хятадын харилцаа, хамтын ажиллагаа ололт амжилтаар дүүрэн байж, хоёр талын худалдаа, эдийн засаг, боловсрол, соёл, хүмүүнлэг зэрэг бүх салбарын хамтын ажиллагаа өргөжин хөгжсөн жил байлаа. Наашлан ирж буй могой жил нь дорнын соёлд амжилт бүтээл, санасан хэрэг саадгүй бүтэхийг бэлгэддэг тул Монгол, Хятадын харилцаа, хамтын ажиллагаа улам илүү амжилттай өргөжин хөгжиж, шинэ түвшинд хүрнэ гэдэгт итгэл төгс байна. Та бүхэн төрлөөрөө түвшин амгалан, элгээрээ энх амгалан, төр улсаараа элбэг дэлбэг, төрөл садан хотлоороо сайхан шинэлэх өлзийтэй ерөөлийг өргөн дэвшүүлье гэжээ.