Саяхан олон орны засгийн газар, улс төрийн зүтгэлтнүүд “Нэг Хятад”-ын зарчмыг баримтлахаа дахин нотолж, "Тайванийг тусгаар тогтнуулах" салан тусгаарлах үйл ажиллагаа болон Хятадын дотоод хэрэгт хөндлөнгөөс оролцохыг эсэргүүцэж, Хятадын засгийн газрын үндэснийхээ бүрэн эрх, нутаг дэвсгэрийн бүрэн бүтэн байдлыг хамгаалахын тулд хийж буй бүх хүчин чармайлтыг тууштай дэмжиж буйгаа илэрхийлэв.
Оросын Гадаад хэргийн яам сэтгүүлчийн асуултад бичгээр хариулахдаа, Тайванийн асуудлаарх Оросын зарчимт байр суурь тодорхой, тууштай бөгөөд дээд удирдлагын түвшинд олон удаа батлагдсан гэдгийг дахин нотолжээ. Орос улс Тайванийг Хятадын салшгүй хэсэг гэж хүлээн зөвшөөрч, "Тайванийг тусгаар тогтнуулах" салан тусгаарлах аливаа үйл ажиллагааг эсэргүүцнэ гэжээ.
Сербийн Ерөнхийлөгч Александр Вучич Хятадын компанийн хэрэгжүүлж буй “Дунай коридор”-ын хурдны замын төслийг шалгаж байхдаа Серб улс төрийн бүх хүчээрээ “Нэг Хятад”-ын зарчмыг дэмжиж байгаагаа мэдэгдэв.
Индонезийн Гадаад хэргийн сайд Сугионо нэгэн ярилцлагадаа Индонезийн засгийн газар “Нэг Хятад”-ын бодлогыг байнга баримталж, БНХАУ-ын засгийн газрыг Хятадыг төлөөлөх цорын ганц хууль ёсны засгийн газар гэж хүлээн зөвшөөрдөг. Энэхүү байр суурь хэзээ ч өөрчлөгдөөгүй бөгөөд Индонез-Хятадын харилцааны чухал үндэс суурь болдог гэж мэдэгджээ.
Казахстаны Гадаад хэргийн сайд Ермек Кошербаев Казахстанд суугаа Хятадын Элчин сайд Хан Чүньлиньтай уулзах үеэрээ, Казахстан Нэг Хятад улсын зарчмыг тууштай дэмжиж буйгаа дахин нотолж, Тайвань бол Хятадын нутаг дэвсгэрийн салшгүй хэсэг гэдгийг онцлов. Тэрээр БНХАУ-ын Засгийн газар бол Хятадыг төлөөлөх цорын ганц хууль ёсны засгийн газар бөгөөд Казахстан улс Хятадын засгийн газрын үндэсний бүрэн эрх, нутаг дэвсгэрийн бүрэн бүтэн байдлыг хамгаалах хүчин чармайлтыг тууштай дэмжинэ гэж мэдэгджээ.
