07-р сарын 16-ны өдөр Хятадын нүүрстөрөгчийн ялгаруулалтын эрхийн арилжааны зах зээл үйл ажиллагаагаа эхлүүлсний таван жилийн ой тохиож байна. Хятадын Экологи, байгаль орчны яамны мэдээлснээр, энэ оны зургаадугаар сарын байдлаар улсын хэмжээнд нүүрстөрөгчийн зах зээлд арилжаалсан квотын нийт хэмжээ 917 сая тонноос давж, арилжааны үнийн дүн 61.7 тэрбум юаниас давсан байна. Ингэснээр Хятад улс дэлхийн хамгийн том нүүрстөрөгчийн зах зээлтэй болжээ. Энэ оны эхний хагаст арилжааны хэмжээ 52.96 сая тоннд хүрч, өмнөх оны мөн үеийнхээс 37 орчим хувиар өссөн байна.

“14-р таван жилийн төлөвлөгөө”-ний хугацаанд дулааны цахилгаан эрчим хүчний салбар нүүрстөрөгчийн зах зээлээр дамжуулан 530 сая тонн нүүрстөрөгчийн ялгарлыг бодитоор бууруулсан байна. Үүний зэрэгцээ аж ахуйн нэгжүүдийн 80 орчим хувийн нүүрстөрөгчийн ялгарлын эрчим буурч, нүүрстөрөгч багатай хөгжлийн хэд хэдэн төслийг хэрэгжүүлэхэд түлхэц үзүүлжээ.

Одоогоор улсын хэмжээнд нүүрстөрөгчийн зах зээлд ган, цемент, хөнгөн цагаан хайлуулах зэрэг салбарын ялгарлын гол эх үүсвэр бүхий 3378 аж ахуйн нэгж хамрагдаж байна. Эдгээр аж ахуйн нэгжийн нүүрстөрөгчийн давхар ислийн ялгаруулалт нийтдээ 8.3 тэрбум тонн орчим байгаа нь Хятадын нийт ялгарлын 65-аас дээш хувийг эзэлж байна.

Хятадын Экологи, байгаль орчны яамны мэдээлснээр, 2027 он гэхэд нүүрстөрөгчийн зах зээлд аж үйлдвэрийн гол ялгаруулагч салбаруудыг бүрэн хамруулж, зах зээлийн механизмын үүргийг улам бүр нэмэгдүүлэн, ногоон, нүүрстөрөгч багатай хөгжлийн шилжилтийг урагшлуулах юм.