БНХАУ-ын Орон сууц, хот хөдөөгийн бүтээн байгуулалтын яамнаас мэдээлснээр, хот суурин газрын дулаан хангамжийн салбарт тулгарч буй дулааны эх үүсвэрийн хангамжийн хүчин чадал хүрэлцэхгүй байгаа, тоног төхөөрөмж эвдрэх зэрэг асуудлыг шуурхай шийдвэрлэхийн тулд Орон сууц, хот хөдөөгийн бүтээн байгуулалтын яам, Үндэсний хөгжил шинэчлэлийн хороо зэрэг зургаан байгууллага хамтран мэдэгдэл гаргаж, хот суурин газрын дулаан хангамжийн “Дулаан өвөл” гурван жилийн үйл ажиллагааг эхлүүлэхээр боллоо. Уг төлөвлөгөөний дагуу 2028 оны эцэс гэхэд ашиглалтад байгаа хуучирсан дулаан хангамжийн шугам сүлжээг шинэчлэх, өөрчлөн сайжруулах ажилд мэдэгдэхүйц ахиц гаргах шаардлага тавьжээ.
Дээр үед баригдсан дулаан хангамжийн шугам сүлжээ, дулааны станц зэрэг байгууламж, тоног төхөөрөмж аажмаар хуучирч, цаг агаарын эрс тэс үзэгдлийн нөлөө нэмэгдсэнээр зарим бүс нутагт дулааны эх үүсвэрийн хангамжийн хүчин чадал хүрэлцэхгүй болж, тоног төхөөрөмж эвдрэх зэрэг асуудал гарч байна. Үүнтэй холбогдуулан зургаан байгууллага хот суурин газрын дулаан хангамжийн “Дулаан өвөл” гурван жилийн үйл ажиллагааг эхлүүлж, таван чиглэлийн хүрээнд 19 гол зорилт дэвшүүлжээ.
Гурван жилийн турш тасралтгүй хэрэгжүүлэх замаар дулаан хангамжийн баталгаат байдал болон үйлчилгээний түвшнийг бүх талаар дээшлүүлж, иргэдийг өвлийн улиралд дулаан, тав тухтай амьдрах нөхцөлөөр хангахыг зорьж байна. Төлөвлөгөөний дагуу орон нутаг бүр “Эхлээд үзлэг, үнэлгээ хийж, дараа нь шинэчлэх” зарчмыг баримтална. Дулаан хангамжийн байгууламж, тоног төхөөрөмжид тогтмол үзлэг, үнэлгээ хийж, ашиглалтын хугацаа нь 20 жилд хүрсэн эсвэл аюулгүй байдалд ноцтой эрсдэл учруулж болзошгүй дулааны шугам сүлжээ, дулааны станц болон холбогдох туслах байгууламжуудыг шинэчлэн засварлах төлөвлөгөөнд хамруулна. Мөн нэг дулаан хангамжийн системд үйлчилдэг, 50 мянган ам метрээс дээш талбайг дулаанаар хангадаг дулааны станцуудыг оновчтой болгон шинэчлэхийг дэмжинэ.
Хот суурин газрын дулаан хангамжийн ихэнх хэсэг нь дулааны цахилгаан станцын дулааны эх үүсвэрт тулгуурладаг тул цаашид дулаан, цахилгаан хослон үйлдвэрлэх агрегатуудыг шинээр барьж ашиглалтад оруулах, шинэчлэх, хүчин чадлыг сайжруулах ажлыг урагшлуулж, дулаан болон цахилгааны хамтын ажиллагааг хөгжүүлэн, дулаан, цахилгаан хослон үйлдвэрлэх системийн дулаан хангамжийн баталгаат байдлыг бэхжүүлнэ. Үүний зэрэгцээ зургаан байгууллага орон нутаг бүрээс дулаан хангамжийн нарийвчилсан удирдлагыг сайжруулж, дулаан хангамжийн системийн ухаалаг технологийн шинэчлэлийг эрчимжүүлэхийг шаарджээ.
Ингэснээр дулааны эх үүсвэрт ойр байрлах газрууд хэт халуун, алслагдсан газрууд хүйтэн буй асуудлыг шийдвэрлэх юм. Мөн халаалтын улиралд үйлчилгээний хяналт, зохицуулалтын механизмыг боловсронгуй болгож, иргэдийн санал, гомдлыг хүлээн авах сувгийг нээлттэй байлгах шаардлагатай. “Иргэд очиж дулаан хангамжийн нөхцөлийг нь асууж тодруулах”, “Гомдлыг хүлээн авч, шуурхай шийдвэрлэх”, “Дулаан хангамжийн үйлчилгээ хариуцсан ажилтан” зэрэг үйлчилгээний механизмыг нэвтрүүлж, үйлчилгээний стандарт болон ажлын шаардлагыг тодорхой болгоно. Ингэснээр иргэдийн хүсэлт гомдолд шуурхай хариу өгч, үр дүнтэй шийдвэрлэн, эцсийн үр дүнг нь хянаж баталгаажуулах хаалттай удирдлагын тогтолцоог байгуулах юм. Хамгийн сүүлийн үеийн мэдээллээр, 2025 оны эцсийн байдлаар БНХАУ-ын хойд бүсийн халаалттай бүс нутгуудын хот суурин газрын төвлөрсөн дулаан хангамжийн нийт талбай 14.75 тэрбум ам метр хүрсэн бөгөөд үүний 11.29 тэрбум ам метр нь орон сууцны барилгын талбай байна.
