Энэ оны эхний гурван улиралд Ганцмод боомтын ачаа тээврийн хэмжээ 38 сая 156 мянган тоннд хүрч, өмнөх оны мөн үеэс 29.3 хувиар өссөн байна. Харин гадаад худалдааны нийт хэмжээ 64 тэрбум 500 сая юаньд хүрч, 55.4 хувиар нэмэгдсэн байна. Ингэснээр тус боомтын импорт, экспортын ачаа тээврийн хэмжээ болон худалдааны үнийн дүн аль аль нь түүхэн ижил хугацааны дээд амжилтыг шинэчлэн тогтоолоо.


Ганцмод боомт нь Монгол Улсаас нүүрс, зэсийн баяжмал, манганы хүдэр зэрэг ашигт малтмал импортлох хуурай замын чухал гарц юм. Хилийн боомтод түшиглэсэн үндэсний хэмжээний логистикийн зангилаа болохын хувьд тус боомтын эрчим хүчний тээврийн стратегийн ач холбогдол улам нэмэгдэж байна. Тус боомтоор импортолж буй коксжих нүүрс нь Хятадын нийт коксжих нүүрсний импортын 28 хувь, зэсийн баяжмал нь улсын нийт импортын 6.3 хувийг эзэлж, коксжих нүүрсний хангамжийг баталгаажуулах, зэсийн баяжмалын импортын эх үүсвэрийг төрөлжүүлэхэд чухал хувь нэмэр оруулж байна. 

 
Энэ он гарснаас хойш Урадын гаалийн газар Хятадын "15 дугаар таван жил"-ийн төлөвлөгөөний хугацаанд хэрэгжүүлэх ухаалаг боомтын бүтээн байгуулалтын гол зорилтуудад анхаарч, гаалийн хяналт шалгалтыг ухаалаг технологид суурилсан хэлбэрт шилжүүлэх ажлыг эрчимжүүлжээ. Тухайлбал, ухаалаг нэвтрэх гарц болон хил дамнасан AGV автомат жолоодлоготой тээврийн хэрэгслийн ухаалаг зохицуулалтын системийг ашиглалтад оруулснаар нэвтрэх гарцын хаалт автоматаар нээгдэж, тээврийн хэрэгслийг хэдхэн секундэд шалган нэвтрүүлэх боломж бүрдсэн байна. Мөн гаалийн үйл ажиллагааны хяналтын төв байгуулж, их өгөгдөл, хиймэл оюун ухаанд суурилсан гаалийн технологи, нисгэгчгүй нисэх төхөөрөмж зэрэг дэвшилтэт технологийг ашиглан алсын зайнаас хяналт, зохицуулалт хийж байна.