Орон нутгийн цагаар 7 дугаар сарын 6-нд Норвегийн Ерөнхий сайд Жонас Гар Сторе Осло хотод ХКН-ын Төв Хорооны Улс төрийн товчооны гишүүн, ГХЯ-ны сайд Ван И-тэй уулзлаа.
Жонас Гар Сторе Хятадын удирдагчдад сайн сайхныг хүсэн ерөөж буйг уламжлахыг Ван И-гээс хүсэж, Норвеги, Хятадын харилцаа харилцан хүндэтгэл, илэн далангүй байдал дээр суурилсан бөгөөд дипломат харилцаа тогтоосноос хойш ерөнхийдөө урагштай хөгжиж байгааг тэмдэглэв. Хятадын сүүлийн жилүүдэд гаргасан асар их хөгжлийн ололт амжилт, ялангуяа хэдэн зуун сая хүнийг ядуурлаас гаргасан амжилтыг Норвеги улс биширч байна. Энэ амжилтыг олон улсын хамтын нийгэмлэг өндрөөр үнэлдэг. Норвеги улс Хятадын томоохон улс гэсэн статусыг чухалчилж, өндөр түвшний харилцаа холбооны эрч хүчийг хадгалах, ногоон эдийн засаг, хиймэл оюун ухаан зэрэг шинээр гарч ирж буй салбар дахь хамтын ажиллагааг өргөжүүлэх, олон улсын болон бүс нутгийн асуудлаарх харилцаа холбоо, зохицуулалтыг бэхжүүлэхийг хүсэн хүлээж байна. НҮБ гол үүрэг гүйцэтгэхийг Норвеги улс дэмжиж, дэлхийн олон талт системийг дэмждэг. Олон улсын хөгжлийн тусламжийн чиглэлээр удаан хугацаанд идэвхтэй оролцож ирсэн Норвеги улс Хойд-Өмнөдийн хамтын ажиллагааг дэмжихэд чухал хувь нэмэр оруулахад бэлэн байна хэмээн тэрээр хэлэв.
Ван И эхлээд Хятадын удирдагчийн мэндчилгээг Ерөнхий сайдад уламжлаад, Ерөнхий сайдын 2024 онд Хятадад хийсэн амжилттай айлчлал нь хоёр талын харилцааны хөгжилд шинэ эрч хүч өгсөн гэдгийг тэмдэглэв. Хоёр орны удирдагчдын хооронд тогтоосон харилцан итгэлцэл, нөхөрлөл нь хоёр орны харилцаанд чухал улс төрийн баталгаа болж байна. Норвеги бол БНХАУ-тай дипломат харилцаа тогтоосон анхны барууны орнуудын нэг бөгөөд энэ нь Норвегийн урт хугацааны стратегийн алсын харааг тусгасан юм. Хамтарсан хүчин чармайлтын ачаар Хятад, Норвегийн харилцаа хөгжлийн эрч хүчээ хадгалсаар ирсэн. Нийгмийн тогтолцоо, түүх соёлын үндэс суурийн ялгааг даван туулж, харилцан хүндэтгэлийн үзэл санааг баримталснаар хоёр тал хамтын ажиллагааг хөгжүүлэн, санал зөрөлдөөнийг зөв зохицуулж, харилцан итгэлцлийг тасралтгүй буй болгож ирсэн. Үүний үр дүнд хоёр талын харилцаа олон улсын өөрчлөгдөж буй нөхцөл байдлын шалгуурыг даван туулж, улам бүр уян хатан, тогтвортой болж байна гэж хэллээ.
Ван И, Хятад улс Норвегитой өндөр түвшний харилцаа холбоогоо хадгалж, хоёр талын харилцааны улс төрийн үндэс суурийг бэхжүүлэхэд бэлэн байгаагаа илэрхийлэв. Тэрээр Норвеги улс НҮБ-ын дүрмийн зарчимд нийцсэн нэг Хятадын бодлогыг үргэлжлүүлэн баримтална гэдэгт итгэлтэй байна. Хоёр тал эдийн засаг, худалдаа, инновац зэрэг салбарын хамтын ажиллагааг эрчимтэй гүнзгийрүүлэхийн тулд тус тусын давуу талаа ашиглан, Хятад, Норвегийн ногоон шилжилтийн хамтын ажиллагаа дэлхий дахинд тэргүүлэх үүрэг гүйцэтгэхийг баталгаажуулахын төлөө ажиллах ёстой. Хятад улс Норвегитой олон талт хамтын ажиллагааг бэхжүүлж, жинхэнэ олон талт үзлийг баримталж, даян дэлхийн дөрвөн том санаачлагыг хэрэгжүүлж, илүү шударга, тэгш дэлхийн засаглалын тогтолцоог буй болгоход бэлэн байна гэж хэлэв.
