Хятадын Төрийн зөвлөлийн ерөнхий сайд Ли Чян 10-р сарын 27-ны өдөр Малайзын Куала Лумпур хотноо Австралийн Ерөнхий сайд Энтони Албанезтай уулзлаа.
Ли Чян:
- Энэ оны 07-р сард Ши Жиньпин дарга эрхэм Ерөнхий сайдтай уулзаж, Хятад-Австралийн харилцааг гүнзгийрүүлэх шинэ төлөвлөгөөг боловсруулж гаргасан. Сүүлийн үед хоёр орон эрүүл тогтвортой харилцаагаа хадгалж байгаа бөгөөд олон салбар дахь харилцаа, хамтын ажиллагаа тогтвортой урагшлуулж байна. Хятад улс Австралийн талтай стратегийн харилцаа холбоогоо хадгалж, харилцан ашигтай хамтын ажиллагааг өргөжүүлэн, хамтдаа урагшилж, илүү боловсронгуй, тогтвортой, үр дүнтэй Хятад-Австралийн иж бүрэн стратегийн түншлэлийн харилцааг бий болгоход бэлэн байна. Энэ нь хоёр орны ард түмэнд илүү их үр өгөөж авчраад зогсохгүй, бүс нутаг болон дэлхийн энх тайван, тогтвортой байдал, хөгжилд илүү их хувь нэмэр оруулах болно.
Ли Чян мөн:
- Хятад улс Австралитай хөгжлийн стратегийн уялдаа холбоо, бодлогын зохицуулалтаа бэхжүүлж, Хятад-Австралийн стратегийн эдийн засгийн яриа хэлэлцээ, Эдийн засгийн хамтарсан хороо зэрэг яриа хэлэлцээний механизмын үүргийг илүү сайн гүйцэтгэж, хоёр орны чөлөөт худалдааны хэлэлцээрийг хянаж, сайжруулах арга замыг идэвхтэй судалж, эдийн засаг, худалдааны гүнзгий, бодит хамтын ажиллагааг цаашид дэмжиж, ногоон эдийн засаг, өндөр технологи, дижитал үйлдвэрлэл зэрэг салбарын хамтын ажиллагааны нөөц боломжийг ашиглахад бэлэн байна. Хятад улс Австралид хөрөнгө оруулах чадвартай Хятадын компаниудыг үргэлжлүүлэн дэмжих бөгөөд Австрали улс Хятадын компаниудад Австралид хөрөнгө оруулах, үйл ажиллагаа явуулах нээлттэй, ил тод, ялгаварлан гадуурхахгүй орчин бүрдүүлнэ. Хоёр тал залуучууд, боловсрол, аялал жуулчлал болон бусад салбарын солилцоо, хамтын ажиллагааг дэмжиж, Хятад, Австралийн ард түмний найрсаг харилцааг хамтдаа хөгжүүлэх ёстой. Дэлхийн засаглалын өнөөгийн хомсдол байнга нэмэгдэж байна. Хятад улс НҮБ, Дэлхийн худалдааны байгууллага зэрэг олон талт механизмын хүрээнд Австралитай зохицуулалтаа бэхжүүлж, дэлхийн засаглалыг тасралтгүй сайжруулан, хөгжүүлэхийг дэмжихэд бэлэн байна гэж хэлэв.
Энтони Албанез:
- Австралийн тал хоёр талын харилцааг тогтвортой хөгжүүлэхийг эрмэлзэж байгаа бөгөөд Хятадын талтай өндөр түвшний харилцаа холбоо, бүх түвшний яриа хэлэлцээг бэхжүүлж, харилцан ойлголцлыг гүнзгийрүүлэн, ялгаа зөрөөгөө тогтоон барьж, худалдаа, ногоон эдийн засаг, уул уурхай, уур амьсгалын өөрчлөлт, хүмүүнлэгийн салбарт хамтын ажиллагаагаа өргөжүүлэхэд бэлэн байна. Хятад улс 2026 онд Ази, Номхон далайн эдийн засгийн хамтын ажиллагааны байгууллагын \АПЕК\ удирдагчдын албан бус уулзалтыг зохион байгуулахыг Австрали дэмжиж, Хятадын талтай харилцаа холбоо, хамтын ажиллагаагаа хадгалж, чөлөөт худалдааны тогтолцоог хамгаалан, бүс нутгийн тогтвортой байдал, хөгжил цэцэглэлтийг дэмжихэд бэлэн байна гэдгээ илэрхийллээ.
