Бээжингийн Тянь Аньмэний талбайд Хятадын ард түмний Японы түрэмгийллийг эсэргүүцэх дайн болон дэлхийн фашизмын эсрэг дайны ялалтын 80 жилийн ойг тэмдэглэх арга хэмжээ ёслол төгөлдөр болов. Энэ сайхан өдрийг дэлхийн ард түмэнтэй хамт тэмдэглэж, гэрэлт ирээдүйг хамтдаа бүтээх зорилгоор цэргийн сүр жавхлант парад зохиолоо. ХКН-ын Төв хорооны ерөнхий нарийн бичгийн дарга, БНХАУ-ын дарга, Цэргийн төв зөвлөлийн дарга Ши Жиньпин чухал илтгэл тавьж, цэргийн парадыг хянав.
ХКН-ын Төв хорооны улс төрийн товчооны байнгын хорооны гишүүн Ли Чян ёслолыг даргаллаа. Ёслолд гадаадын 61 орны төр засгийн тэргүүн, холбогдох улс орнуудын өндөр түвшний төлөөлөгчид, олон улсын байгууллагын тэргүүн нар, улс төрийн удирдагч асан хүмүүс оролцлоо.
08 цаг 35 минутад Ши Жиньпин дарга хуралд оролцож буй гадаадын төлөөлөгчдийн тэргүүн нарын хамт Тянь Аньмэний хаалганы цамхаг руу шатаар өгсөн гарав. Дарга Ши Жиньпин Японы түрэмгийллийг эсэргүүцэх дайнд оролцсон ахмад дайчдын төлөөлөлтэй гар барин мэндчилж, тэднийг дээд зэргээр хүндэтгэж байгаагаа илэрхийллээ.
Өглөөний 09:00 цагт хонх дуугарч, дурсгалын арга хэмжээ эхлэв.
Таван одтой улаан тугаа намируулсаар төрийн хүндэт харуулууд Ардын баатруудын хөшөөнөөс талбайн хойд талын туг мандуулах талбай хүртэл сүр жавхаатай алхана.
Халуун алга ташилтын дунд Ши Жиньпин чухал үг хэллээ. Тэрээр:
- Өнөөдөр бид Хятадын ард түмний Японы түрэмгийллийг эсэргүүцэх дайн болон дэлхийн фашизмын эсрэг дайны ялалтын 80 жилийн ойг тэмдэглэхээр ёслол төгөлдөр цуглаж байна. Бидний зорилго бол түүхийг дурсаж, үрэгдсэн баатруудынхаа дурсгалыг хүндэтгэн, энх тайвныг эрхэмлэж, ирээдүйг бүтээх явдал юм гэж хэллээ.
Ши Жиньпин ХКН-ын Төв Хороо, БХАТИХ, Төрийн Зөвлөл, Хятадын Ардын УТЗЗ-ийн бүх Хятадын хороо, Цэргийн төв зөвлөлийн нэрийн өмнөөс Японыг эсэргүүцэх дайнд оролцсон ахмад дайчид, эх орончид, генералуудад хүндэтгэл үзүүлэв. Тэрээр Хятадын ард түмний Японы түрэмгийллийг сөрөн зогсоход дэмжлэг үзүүлж тусалсан гадаадын засгийн газар, олон улсын анд нөхдөд чин сэтгэлээсээ талархаж буйгаа илэрхийлж, өнөөдрийн хуралд оролцож буй зочдыг халуун дотноор угтаж байгаагаа илэрхийлэв.
Дарга Ши Жиньпин:
- Японы түрэмгийллийг эсэргүүцэх Хятадын ард түмний дайн бол туйлын хүнд бэрх мөртөө агуу их дайн юм. ХКН-ын байгуулсан Японы эсрэг үндэсний нэгдмэл фронтын далбаан дор Хятадын ард түмэн хүчирхэг дайснуудын эсрэг тууштай тэмцэж, өөрсдийн мах цусаараа хамгаалалтын хана босгож, орчин үеийн харийн түрэмгийллийн эсрэг анхны бүрэн ялалтыг байгуулсан юм. Японы түрэмгийллийн эсрэг Хятадын ард түмний эсэргүүцлийн дайн бол дэлхийн фашизмын эсрэг дайны чухал бүрэлдэхүүн хэсэг. Хятадын ард түмэн үндэсний хүнд хохирлоороо хүн төрөлхтний соёл иргэншлийг аварч, дэлхийн энх тайвныг хамгаалахад чухал хувь нэмэр оруулсан юм. Хүн төрөлхтний хувь заяа хоорондоо нягт холбоотой гэдгийг түүх бидэнд сануулдаг. Улс орон, үндэстнүүд харилцан эрх тэгш хандаж, эв найрамдалтай амьдарч, бие биенээ дэмжиж байж л хамтын аюулгүй байдлаа хамгаалан, дайны үндсэн шалтгааныг арилгаж, түүхэн эмгэнэлт явдал дахин давтагдахаас сэргийлж чадна.
Ши Жиньпин дарга:
- Хятад үндэстэн бол хүчирхийллээс айдаггүй, бие даасан, хүчирхэг агуу үндэстэн юм. Өнгөрсөн хугацаанд шударга ёс ба харгислал, гэрэл гэгээ ба харанхуй, хөгжил дэвшил ба ухралтын хооронд үхэж сэхэхээ үзэлцэх тэмцэлтэй тулгарч байсан юм. Хятадын ард түмэн нийтлэг үзэн ядалтыг эсэргүүцэн босч, үндэстний оршин тогтнох, үндэсний сэргэн мандалт, хүн төрөлхтний шударга ёсны төлөө тэмцсэн юм. Өнөөдөр хүн төрөлхтөн дахин энх тайван, эсвэл дайн дажин, яриа хэлэлцээ эсвэл сөргөлдөөн, аз сорьсон тоглолтын аль нэгийг нь сонгох дээрээ тулаад байна. Хятадын ард түмэн түүх, хүн төрөлхтний соёл иргэншлийн хөгжил дэвшлийн зөв талд тууштай зогсож, энх тайван хөгжлийн замыг тууштай баримталж, дэлхийн улс түмэнтэй гар нийлэн, хүн төрөлхтний хувь заяаны хамтын цогцыг хамтдаа цогцлоохын төлөө зүтгэнэ.
Дарга Ши Жиньпин:
- Хятадын Ардын Чөлөөлөх Арми бол нам, ард түмний бүрэн итгэж болох баатарлаг хүчин байсаар ирсэн. Ардын Чөлөөлөх Армийн нийт офицер дайчид дархан үүргээ үнэнчээр биелүүлж, дэлхийн жишигт нийцсэн цэрэг армийг бүтээн байгуулж, үндэсний бүрэн эрх, эв нэгдэл, нутаг дэвсгэрийн бүрэн бүтэн байдлыг тууштай хамгаалж, Хятадын үндэстний агуу их сэргэн мандалтад стратегийн дэмжлэг үзүүлж, дэлхийн энх тайван, хөгжилд улам их хувь нэмэр оруулах ёстой гэж хэлэв. Ши Жиньпин дарга: - Шинэ эрин, шинэ аян замд Хятадын үндэстний ард түмэн ХКН-ын хүчтэй удирдлага дор марксизм-ленинизм, Мао Зэдүний үзэл санаа, Дэн Шяопиний онол, "Гурвыг төлөөлөх"-ийн чухал үзэл санаа, Хятадын нийгмийн хөгжлийн үзэл баримтлал, шинжлэх ухааны хөгжлийн үзэл баримтлалыг хэрэгжүүлэх ёстой. Шинэ эриний онцлог, Хятадын онцлогтой социализмын замаар гуйвшгүй замнаж, улс үндэстнээ хөгжүүлэхээр сэтгэл нэгдэн ажиллах хэрэгтэй гэж онцлон тэмдэглэлээ.
Дарга Ши Жиньпин төгсгөлд нь:
- Хятадын үндэстний агуу их сэргэн мандалтыг зогсоох аргагүй юм! Хүн төрөлхтний энх тайван, хөгжлийн эрхэм үйлс ялах нь гарцаагүй!
09:15 цагт цэргийн парад эхэллээ. Цэргийн оркестр парадын дуут дохиог эгшиглүүлэв. Ши Жиньпин дарга машинд суугаад Жиньшүйн гүүрээр гарч Чан-Ань өргөн чөлөөнд гарав. Парадын ерөнхий командлагч Хань Шэнянь цэргүүд бүрдээд дууссан гэж мэдэгдсэн бөгөөд Ши Жиньпин шалгалтыг эхлүүлэх тушаал өгсөн байна. Парадын тэргүүн эгнээнд ХКН, БНХАУ, Ардын чөлөөлөх армийн тугнууд жагсана. Ши Жиньпин дарга нам, төрийн болон цэргийн тугуудын өмнүүр машинтай явж, тэдэнд хүндэтгэл үзүүлэв.
Дарга Ши Жиньпин цэргийн сүр жавхлант хөгжмийн аялгуун дунд Чан-Ань өргөн өргөн чөлөөгөөр явж, 13 явган цэргийн хайрцаг, нэг байлдааны тугийн хайрцаг, 22 техник хэрэгслийн хайрцгийг дэс дараатай хянав. Цэргүүд, хуягт машинууд эмх цэгцтэй жагсаж, сүр жавхаатай байв. Энэ бол 100 жилийн ойгоо тэмдэглэж буй Ардын чөлөөлөх армийн хувьд цоо шинэ дүр төрх бөгөөд дэлхийн энх тайвныг сахин хамгаалах Хятадын үндэстний тууштай тунхаг байлаа.
Цэргийн парадын хяналтын дараа Ши Жиньпин дарга Тянь Аньмэний хаалганы цамхагт гарав.
Парадад нийт 45 анги /хайрцаг/ оролцсон бөгөөд ихэнх нь зэвсэг техникүүд байв. Энэ нь шинэ үеийн Ардын чөлөөлөх армийн улс төрийн шинэ үзэл бодол, хүчний бүтэц, шинэчлэлийн ахиц дэвшил, ардын чөлөөлөх армийн байлдааны бэлэн байдлыг харуулсан юм.
Намын туг, төрийн далбаа, цэргийн далбааг өргөсөн хүндэт харуул зүүн Чан-Аны өргөн чөлөөгөөр сүр жавхлантай алхав. ХКН-аар удирдуулсан Ардын чөлөөлөх арми ямагт эх орныхоо хамгаалагч, социализмын хамгаалагч, ард түмний эрх ашгийн хамгаалагч байх болно. Иж бүрэн, гүнзгий шинэчлэл хийсний дараа Ардын чөлөөлөх арми дөрвөн алба, дөрвөн төрлийн цэрэг болон зэвсэгт хүчний парад зэрэг цэрэг, зэвсгийн шинэ бүтцийг бүрдүүлэв. Тэнгисийн цэргийн хайрцаг, Агаарын цэргийн хайрцаг, Пуужингийн цэргийн хайрцгууд нь сүр жавхлантай, гайхалтай байлаа. Агаарын сансрын цэрэг, Кибер орон зайн цэргийн хайрцаг, Мэдээллийг дэмжих цэргийн хайрцаг нь цэргийн шинэчлэл, хүчирхэгжилтийн шинэ санааг илэрхийлж байв. Хятадын арми бодит үйл ажиллагаагаар том гүрний үүрэг хариуцлага, хүн төрөлхтний хувь заяаны нэгдмэл цогцыг хамтдаа байгуулахад оруулсан чухал хувь нэмрийг харууллаа.
Ши Жиньпин дарга болон Хятадын ба гадаадын бусад удирдагчид, үзэгчид байн байн алга ташиж, уухайлж байв.
80 000 энх тайвны тагтаа жигүүрээ дэлгэн өндөрт нисч, 80 000 бөмбөлөг тэнгэрт хөөрөв. “Эх орноо дуулъя” дууны эгшиглэнт хөгжим талбай даяар эгшиглэв. Ши Жиньпин дарга болон бусад хүмүүс нийгмийн бүх давхаргын ард түмэнд мэндчилгээ дэвшүүлж, талбай болон түүний эргэн тойронд баяр хөөрөөр бялхав.
Ёслолын арга хэмжээ нэг цаг 26 минут үргэлжилж 10:26 цагт амжилттай өндөрлөв.
Ёслол эхлэхийн өмнө Ши Жиньпин болон түүний гэргий Пэн Лиюань нар хуралд оролцож буй гадаадын төлөөлөгчдийн тэргүүн, гэргий нарыг угтан авч, дурсгалын зураг татуулжээ.
БНХАУ-д суугаа гадаадын төлөөлөгчдийн гишүүд, элчин сайд, цэргийн атташе, Хятад дахь олон улсын байгууллагын төлөөлөгчид, Японы түрэмгийллийг эсэргүүцэх дайнд Хятад улс аялахад хувь нэмрээ оруулсан олон улсын анд нөхдийн төлөөлөл болон тэдний гэр бүлийнхэн, мөн Бээжин дэх гадаадын мэргэжилтнүүдийн төлөөлөгчид ёслолд урилгаар оролцлоо.
