Хятад улсын дарга Ши Жиньпин 05-р сарын 25-ны үдээс хойш Бээжин дэх Ардын Их Хурлын ордонд Хятад улсад албан ёсны айлчлал хийж буй Исламын Бүгд Найрамдах Пакистаны Ерөнхий сайд Шехбаз Шарифтай уулзлаа.
Ши Жиньпин дарга:
- Хятад, Пакистаны хооронд дипломат харилцаа тогтоосноос хойших 75 жилийн хугацаанд хоёр улс харилцан ойлголцож, харилцан итгэлцэж, харилцан дэмжиж, бат бэх уламжлалт нөхөрлөлийг бий болгосон юм. Хоёр талын стратегийн харилцан итгэлцэл, ажил хэрэгч хамтын ажиллагаа нь тус тусын улс орны хөгжилд хүчтэй түлхэц болсон. Саяхан би Тяньжинийн Их Сургуульд суралцаж буй Пакистаны оюутнуудаас захидал хүлээн авсан. Эдгээр оюутнууд Хятад, Пакистаны хамтын ажиллагааг хөгжүүлэгч, солилцоог түгээгч, нөхөрлөлийн хамгаалагч болохоо амласан. Манай хоёр орны найрамдлын үйл хэрэгт залгамжлагчид байгааг хараад би маш их баяртай байна. Хоёр тал шинэ эрин үед Хятад, Пакистаны улам нягт хувь заяаны нэгдмэл цогцыг байгуулах ажлыг хурдасгаж, хоёр улсын "Бүх цаг үе"-ийн хамтын ажиллагаа улам бүр үр дүнд хүрэхийг баталгаажуулах ёстой. Энэ нь хоёр орны ард түмэнд илүү их ашиг тусаа өгөхөөс гадна бүс нутгийн энх тайван, тогтвортой байдалд хувь нэмэр оруулж, хөрш орнуудын дунд хамтын ирээдүйтэй нийгэмлэг байгуулах үлгэр дуурайл болно гэж хэлэв.
Ши Жиньпин дарга:
- Пакистаны тал тусгаар тогтнол, бүрэн эрхт байдал, нутаг дэвсгэрийнхээ бүрэн бүтэн байдлыг хамгаалахыг Хятадын тал тууштай дэмжиж байна. Хятад улс Пакистантай өндөр түвшний харилцаа холбоогоо хадгалах, стратегийн харилцаа холбоогоо бэхжүүлэх, хоёр талын харилцааг зөв чиглэлд чиглүүлэхэд бэлэн байна. Хоёр тал Хятад, Пакистаны хувь заяаны цогц нэгдлийг байгуулах үйл ажиллагааны төлөвлөгөөг тууштай урагшлуулж, томоохон түүхэн төслүүдийг амьжиргаанд чиглэсэн төслүүдтэй уялдуулж, хөдөө аж ахуй, аж үйлдвэр, хиймэл оюун ухаан, авьяас чадварыг хөгжүүлэх зэрэг салбарт бүх талын хамтын ажиллагааг гүнзгийрүүлэх ёстой. Хоёр тал бүс нутгийн энх тайван, тогтвортой байдлыг хамтран хамгаалахын тулд аюулгүй байдлын хамтын ажиллагааг илүү өндөр түвшинд, өргөн хүрээнд явуулах ёстой. Хятад улс Пакистаны идэвхтэй хүчин чармайлт, Ойрхи Дорнодын бүс нутагт энх тайвныг сэргээхэд туслах зуучлагчийн үүргийг өндрөөр үнэлж байна. Хоёр тал нягт харилцаа холбоо, зохицуулалтаа үргэлжлүүлж, ганц талт үзэл, хүйтэн дайны сэтгэлгээг хамтдаа эсэргүүцэн, тэгш, эмх цэгцтэй олон туйлт ертөнц, мөн бүх нийтийн ашиг тустай, хүртээмжтэй эдийн засгийн даяаршлыг хамтдаа дэмжих ёстой гэж хэллээ.
Ерөнхий сайд Шехбаз Шариф дарга Ши Жиньпин бол Пакистаны ард түмний сайн найз төдийгүй дэлхийн энх тайвныг эрхэмлэгч бүх ард түмний сайн найз гэж мэдэгдэв. Тэрээр:
- Хятад улсын дарга Ши Жиньпиний хүчтэй удирдлага дор Хятадын эдийн засаг дэлхийд алдартай амжилтад хүрч, дэлхийн энх тайвныг хадгалах, олон туйлт ертөнцийг байгуулах бат бөх баталгаа болж байна. Пакистан, Хятадын хоорондох "төмөр мэт бат бөх" нөхөрлөлийг хоёр орны ахмад үеийн удирдагчид биечлэн бий болгосон бөгөөд энэ нь цаг хугацааны шалгуурыг давсаар, хосгүй хэвээр байна. Пакистан "Нэг Хятад" зарчмыг хатуу баримталж, Хятадын үндсэн ашиг сонирхолд хамаарах бүх асуудлаарх байр суурийг тууштай дэмжиж, Хятадын сайн найз, түнш хэвээр байхаа амлаж байна. Пакистан улс дипломат харилцаа тогтоосны 75 жилийн ойг тэмдэглэх, Хятадын төрийн засаглалын туршлагаас суралцах, "Бүс ба Зам" санаачлагын хүрээнд хамтын ажиллагааг гүнзгийрүүлэх, Хятад-Пакистаны эдийн засгийн коридорын бүтээн байгуулалтыг урагшлуулахад Хятадтай хамтран ажиллахад бэлэн байна. АНУ, Иран хоорондын хэлэлцээнд Пакистан зуучлалын хүчин чармайлт гаргаж буйг дэмжсэн Хятадын талд талархал илэрхийлж байна. Ойрхи Дорнодын нөхцөл байдлын талаар дарга Ши Жиньпиний дэвшүүлсэн дөрвөн зүйлт санал нь энх тайвныг тогтооход чиглүүлэгч хүрээ болж байна. Пакистан Хятадтай нягт уялдаа холбоотой ажиллаж, дэлхийн энх тайван, тогтвортой байдлыг дэмжихэд хувь нэмэр оруулахын тулд хамтран ажиллахад бэлэн байна гэж хэллээ.
Ван И уулзалтад оролцов.
