БНХАУ-ын дарга Ши Жиньпин 10-р сарын 30-ны үдээс хойш Бээжингийн ардын их хурлын ордонд Хятадад төрийн айлчлал хийж буй Германы Ерөнхийлөгч Франк-Вальтер Штайнмайертай хэлэлцээ хийв.
Ши Жиньпин хэлэхдээ, дипломат харилцаа тогтоосноос хойших хагас зуу гаруй жилийн хугацаанд Хятад, Германы харилцаа өндөр түвшинд хөгжиж ирсэн бөгөөд хоёр орон ямагт харилцан итгэлцсэн найз, бие биеийнхээ хөгжилд хувь нэмэр оруулдаг түнш байсаар ирсэн юм. Өнөөдөр дэлхий ертөнцөд сүүлийн зуун жилд тохиогоогүй гүнзгий өөрчлөлтүүд хурдацтай өрнөж, тогтворгүй байдал, эмх замбараагүй байдлын хүчин зүйлс улам бүр нэмэгдэж байна. Дэлхийн хоёр, гурав дахь том эдийн засгийн цогцын хувьд Хятад, Герман хоёр улс Хятад, Европын харилцааг хөгжүүлэх, дэлхийн эдийн засгийн тогтвортой өсөлтийг хангах чухал үүрэг, хариуцлага хүлээж байгаа тул харилцаа холбоо, хамтын ажиллагаагаа бэхжүүлж, эрх тэгш, харилцан ашигтай, стратегийн тогтвортой хамтын ажиллагааны шинэ загварыг бий болгох нь зүйтэй. Мөн дэлхий нийтэд нээлттэй байдлыг эрхэмлэж, хаалттай байдлыг эсэргүүцэх, хамтын ажиллагааг дэмжиж, сөргөлдөөнийг эсэргүүцэх эерэг дохио өгөх шаардлагатай байна. Хятад улс Германтай хамт хоёр орны бүх талын стратегийн түншлэлийн харилцааны шинэ хуудсыг нээж, илүү шударга, зохистой дэлхийн засаглалын тогтолцоог бүрдүүлэхэд хамтран хүчин чармайлт гаргахад бэлэн байна гэжээ.
Ши Жиньпин онцлон тэмдэглэхдээ, төрийн бодлого тогтвортой, тууштай байх нь чухал юм. Хятад улсын Германд чиглэсэн бодлого тууштай, тогтвортой, урьдчилан таамаглах боломжтой бөгөөд Германы их гүрний байр суурийг өндрөөр үнэлж, Германы нэгдэл, хөгжлийг ямагт дэмжиж ирсэн юм. Герман улс Европын болон олон улсын үйл хэрэгт илүү чухал үүрэг гүйцэтгэхийг Хятад улс сайшааж байна. Хятад улсын хөгжлийг болон Хятадтай хийх хамтын ажиллагааг нээлттэй, эерэг байр сууринаас авч үзэж, Хятадад чиглэсэн бодлогодоо ухаалаг, бодитой, найрсаг хандлагыг баримталж, харилцан хүндэтгэх, эрх тэгш харилцах зарчмыг тууштай мөрдөнө гэдэгт Германы тал найдаж байна. Энэ нь Хятад, Германы харилцааг тасралтгүй, эрүүл саруул хөгжүүлэхэд хуримтлагдсан үнэт туршлага юм.
Герман улс нь дэвшилтэт үйлдвэрлэл, чансаатай бүтээгдэхүүний төлөөлөл болсон орон бол Хятад улс чансаатай хөгжлөөр дамжуулан Хятадын онцлогтой орчин үеийн шинэчлэлийг урагшлуулж байна. Хоёр орны хөгжлийн стратеги харилцан нийцэж, хамтын ажиллагааны өргөн боломж нээлттэй байна. Хятад улс гадаадад чиглэсэн өндөр түвшний нээлттэй бодлогыг тууштай хэрэгжүүлж, бизнесийн орчноо тасралтгүй сайжруулан, Герман зэрэг дэлхийн улс орнуудын аж ахуйн нэгжүүдийг Хятадад урт хугацаанд хөрөнгө оруулж, асар том зах зээлийн үр өгөөжөөс хуваалцахыг урьж байна. Германы тал нээлттэй, хүртээмжтэй байр сууриа хадгалж, Германд үйл ажиллагаа явуулж буй Хятадын аж ахуйн нэгжүүдэд шударга, ил тод, ялгаварлан гадуурхахгүй бизнесийн орчин бүрдүүлж, Хятад, Германы бодит хамтын ажиллагааг өргөжүүлэн бэхжүүлэхийг хүсэж байна.
Хятад улс Германтай хиймэл оюун ухаан, ногоон, нүүрстөрөгч багатай хөгжил, үйлчилгээний худалдаа, дижитал эдийн засаг зэрэг салбарт хамтын ажиллагаагаа өргөжүүлж, ирээдүйн өрсөлдөх чадвараа хамтдаа дээшлүүлэхэд бэлэн байна. Ингэснээр хоёр орны хамтын ажиллагааны цар хүрээг өргөжүүлж, хөгжлийн шинэ эрч хүч нэмнэ. Хятад, Германы ард түмэн хоёулаа хөдөлмөрч, ухаалаг, тэсвэр хатуужилтай сайхан чанаруудтай бөгөөд хоёр орны найрамдалт харилцааг дэмждэг. Иймээс хоёр тал соёл, боловсрол, урлагийн солилцоог дэмжиж, иргэдийн харилцан зорчих нөхцөлийг хөнгөвчлөн, ард түмний харилцан ойлголцлыг гүнзгийрүүлэх хэрэгтэй. Ингэснээр ирэх онд дипломат харилцаа тогтоосны 55 жилийн ойг хамтдаа тэмдэглэх таатай уур амьсгалыг бүрдүүлнэ гэжээ.
Ши Жиньпин цааш нь хэлэхдээ, Хятад улс Европын Холбоог ямагт түншээ хэмээн үзэж, чин сэтгэл, сайн санааны үндсэн дээр Европтой харилцах харилцаагаа хөгжүүлж иржээ. Түүхэн болон бодит нөхцөл байдал Хятад, Европын хамтын ажиллагаа өрсөлдөөнөөс илүү, нийтлэг ойлголцол зөрчилдөөнөөс илүү гэдгийг нотлов. Хятад, Европын худалдаа, эдийн засгийн харилцааны мөн чанар нь давуу талаа харилцан нөхөж, харилцан ашиг хүртэхэд оршдог. Харилцан хүндэтгэж, бие биеэ ойлгон, харилцан буулт хийх нь хоёр талын хамтын амжилтын үндэс юм. Харин ялгаатай байдлаа хүлээн зөвшөөрч, нийтлэг ашиг сонирхлоо эрэлхийлэхийн зэрэгцээ зарчимч байр сууриа хадгалж, шинэчлэлийг дэмжих нь хамтын хөгжлийн гол түлхүүр юм.
Хятад, Европын харилцаа олон сорилтыг туулж ирсэн бөгөөд хамтын ажиллагааны явцад гарч буй зарим асуудал нь хөгжлийн явцад үүссэн бэрхшээл, урагшлах явцад бий болсон зөрчил юм. Түншлэлийн харилцааны байр сууриа тууштай баримталж, эрх тэгш яриа хэлэлцээний зарчмыг хадгалж чадвал санал зөрөлдөөн, асуудлыг шийдвэрлэх боломжтой бөгөөд энэ нь Хятад, Европын харилцааны цаашдын хөгжилд саад болохгүй. Европын тал Хятадтай нэг зүгт чиглэн, эрх тэгш, эмх цэгцтэй дэлхийн олон туйлт тогтолцоо болон бүх нийтэд хүртээмжтэй, харилцан ашигтай эдийн засгийн даяаршлыг хамтран урагшлуулахыг хүсэж байна гэжээ.
Ши Жиньпин Хятадын Коммунист Намын Төв Хорооны XX сонгуулийн тавдугаар бүгд хурлын талаар Штайнмайерт танилцууллаа. Тэрээр хэлэхдээ, улсаа засаглан удирдахын тулд эхлээд намаа засаж, нам хүчирхэг байж улс орон хүчирхэгжинэ. Намын сахилга батыг бүх талаар чанд сахиулах ажлыг тууштай, тасралтгүй урагшлуулах нь ард түмний өргөн хүрээний дэмжлэг, итгэлийг хүлээх болно. Хятадын Коммунист Нам Герман зэрэг дэлхийн улс орнуудын улс төрийн гол намуудтай төрийн засаглал, улс орныг удирдах туршлагаа харилцан солилцоход бэлэн байна гэжээ.
Штайнмайер хэлэхдээ, сүүлийн 25 жилийн хугацаанд би Хятадад найман удаа айлчилж, тус улсын хурдацтай хөгжлийг өөрийн нүдээр харсан. Айлчлал бүрийн үеэр Хятад улс шинэ өнгө төрхөө харуулж байлаа. Өнөөдөр Хятад улс улс төрийн нөлөө, эдийн засаг, шинжлэх ухаан, технологийн хүч чадлаараа дэлхийд чухал байр суурь эзэлсэн их гүрэн болжээ. Ши Жиньпин даргын удирдлага дор Хятад улс хөгжлийн асар их амжилтад хүрснийг Германы тал өндрөөр үнэлж байна.
Хятад, Германы харилцаа нягт, харилцан ашигтай, эрч хүчтэй бөгөөд хоёр тал ямагт бие биеэ хүндэтгэж, эрх тэгш яриа хэлэлцээ өрнүүлсээр ирсэн. Түүнчлэн олон салбарын хамтын ажиллагаа бодит үр дүнд хүрч, хоёр орны хөгжилд хувь нэмэр оруулж байна. Германы тал нэг Хятадын бодлогыг тууштай баримталж, хоёр орны харилцааны ирээдүйд итгэл дүүрэн байна. Хятад улстай өндөр түвшний харилцаа, уулзалтыг тогтмол үргэлжлүүлж, худалдаа, шинжлэх ухаан, технологи, хиймэл оюун ухаан, байгаль орчныг хамгаалах зэрэг салбарын хамтын ажиллагааг бэхжүүлж, хүмүүнлэгийн солилцоог өргөжүүлэхэд бэлэн байна.
Хоёр тал яриа хэлэлцээ, зөвшилцлийн замаар худалдаа, эдийн засгийн салбар дахь санал зөрөлдөөнөө зохистой шийдвэрлэж, харилцан ашигтай, хамтдаа хожих үр дүнд хүрэх боломжтой бөгөөд энэ нь дэлхий нийтэд үлгэр жишээ болно. Олон улсын дэг журам өнөөдөр ихээхэн дарамт, сорилттой тулгарч байгаа бөгөөд дэлхий нийт Хятад улсыг илүү чухал үүрэг гүйцэтгэнэ хэмээн хүлээж байна. Германы тал дэлхийн энх тайван, хөгжлийг хамгаалах хариуцлагыг Хятад улстай хамтран үүрч, НҮБ-ын дүрмийн зорилго, зарчмыг хамгаалах, олон улсын эрх зүйн эрх мэдлийг сахин хамгаалах, чөлөөт худалдаа болон Дэлхийн худалдааны байгууллагын дүрмийг дэмжих, ивээх үзлийг эсэргүүцэх, худалдааны дайныг эсэргүүцэхэд бэлэн байна гэжээ.
Хэлэлцээнээс өмнө Ши Жиньпин болон түүний гэргий Пэн Лиюань нар Ардын Их Хурлын ордны зүүн хаалганы гаднах талбайд Германы Ерөнхийлөгч Штайнмайер болон түүний гэргий Бүдэнбендерт зориулан угтах ёслол зохион байгууллаа.
