Энэ аяллын үеэр бид эцэс төгсгөлгүй мэт үргэлжлэх ногоон цайны тариалангийн талбайгаар зочилж, байгальд ээлтэй үйлдвэрлэл хэрхэн дэлхийн зах зээлд хүрч байгааг нүдээр үзэв. Уул толгодоо түшиглэн хөгжсөн цайны аж ахуй нь зөвхөн эдийн засгийн үр өгөөж бус, экологийн тэнцвэрийг хадгалсан тогтвортой хөгжлийн жишээ болж байлаа. Аяллын бас нэгэн сонирхолтой хэсэг нь дэлхийн хамгийн том данхыг үзэж сонирхсон явдал байлаа. Энэ нь зөвхөн аялал жуулчлалын үзмэр төдийгүй цайны соёлоо сурталчлах бэлгэдэл болсон нь анзаарагдсан.
Гүйжөүгийн хөгжлийг харахад хамгийн их анхаарал татсан зүйл нь дэд бүтэц байв. Өндөр хурдны зам, орчин үеийн гүүрэн байгууламж, уулс дундуур сүлжилдэх төмөр замууд нь газарзүйн хүндрэл бэрхшээлийг хөгжлийн боломж болгон хувиргаж чадсаныг илтгэнэ. Үүний зэрэгцээ дижитал технологи, ухаалаг үйлдвэрлэл, орчин үеийн хөдөө аж ахуй нь бүс нутгийн хөгжлийн шинэ өнгө төрхийг бүрдүүлжээ.
