БНХАУ-ын баруун өмнөд хэсэгт орших, “Уулсын хаант улс” гэгддэг Гүйжөү мужаар аялж, үсрэнгүй хөгжил дэвшил, соёлын арвин өвтэй нь танилцах боломж олгосон Өвөр Монголын Өдрийн сонины хамт олонд юуны түрүүнд талархсанаа илэрхийлье. Хоёр орны хэвлэл мэдээллийн салбарын хамтын ажиллагааны хүрээнд зохион байгуулсан “Үзэсгэлэнт Гүйжөү нутгаар” Хятад, Монголын сэтгүүлчдийн хамтарсан сурвалжилгын аян нь мэргэжлийн болоод хувь хүний хувьд мартагдашгүй, үнэ цэнтэй томилолт байлаа.
Энэхүү томилолтын хамгийн гол ололт нь Хятадын Засгийн газраас хэрэгжүүлж буй ядуурлыг бууруулах, хоршооллыг дэмжих бодлого бодит амьдралд хэрхэн биеллээ олж, иргэдийн амьжиргааг өөрчилснийг сурвалжилсан явдал байв. Тухайлбал, далайн түвшнээс дээш 1350 метрийн өндөрт орших цайны тариалангууд, тэр дундаа экологийн тэнцвэрийг хадгалж, олон улсын зах зээлд брэндээ гаргаж чадсан “Шэньчюэ”, гар аргаар цай боловсруулах уламжлалыг пивоны инновацтай хослуулсан “Яньшүн байшюэ”, эмэгтэйчүүдийн хөдөлмөр эрхлэлтийг тууштай дэмжиж, мянга мянган өрхийг ядуурлаас гаргасан “Хуан Хун Ин” зэрэг үйлдвэрийн бүтээлч туршлага, хоршооллын систем гүн сэтгэгдэл үлдээлээ. Мөн Гүйжөү муж бол соёл, түүхийн хувьд ч баялаг өвтэй нутаг аж. Мяо үндэстний өвөрмөц соёл, уламжлалт амьдралтай танилцаж, тэдний өвөрмөц ахуйг нүдээр үзэж, үзгээр тэмдэглэнэ гэдэг сэтгүүлч хүний хувьд ховор завшаан байлаа.
Үүнээс гадна Хятадын нэрийн хуудас гэгддэг Маотай архины эх нутгаар зочилж, нутгийн иргэдийн тутарга тариалалтыг дэмжих замаар бүс нутгийн эдийн засгийг бүхэлд нь шинэ шатанд гаргасан энэхүү жишиг нь ядуурлыг бууруулах бодлогын маш том хөдөлгүүр, бодит үр дүн болохыг мэдлээ.
