Өнөөдөр буюу 06-р сарын 08-ны өдрийн үдэд БНАСАУ-ын Хөдөлмөрийн Намын Ерөнхий нарийн бичгийн дарга, Төрийн зөвлөлийн дарга Ким Жөн Ун Пхеньяны Ким Ир Сенийн талбайд ХКН-ын Төв хорооны ерөнхий нарийн бичгийн дарга, БНХАУ-ын дарга Ши Жиньпинийг угтан авах өргөн дэлгэр ёслол зохион байгууллаа.
Талбайн төвд БНХАУ, БНАСАУ-ын хоёр нам, хоёр улсын удирдагчдын томоохон хөрөг өлгөсөн байв. Талбайн хоёр талаар хятад, солонгос хэлээр “БНХАУ-БНАСАУ-ын найрамдал мөнхөд орших болтугай”, “БНХАУ-БНАСАУ-ын бат найрамдал мандан бадраг” гэсэн уриа тэмдэглэсэн байлаа.
Дарга Ши Жиньпин болон түүний гэргий Пэн Лиюаний суусан машин талбайд хүрч ирэхэд морьт цэргийн эгнээ угтан авч, цэргийн хөгжим хамтлаг угтлагын аяс эгшиглүүлж, Ким Жөн Ун болон түүний гэргий Ли Соль Жу талбайд угтан авчээ. Ши Жиньпин, Пэн Лиюань нар Ким Жөн Ун, Ли Соль Жу нарын дагалдан явж буй хүмүүстэй мэндэлж, гар барив. Хоёр нам, хоёр улсын удирдагчид хамтдаа тавцанд гарч, цэргийн хөгжмийн хамтлаг хоёр улсын төрийн дууллыг эгшиглүүлэн, 21 удаа ёслолын буудлага үйлдлээ.
Ши Жиньпин Ким Жөн Уны хамт БНАСАУ-ын ардын армийн гурван замын цэргийн ангийн ёслолын эгнээг шалгаж, цэргийн албан хаагчид солонгосоор “Эрхэм Ши Жиньпин дарга танд эрүүл энхийг хүсье” хэмээн мэндчиллээ. Үүний дараа хоёр удирдагч хамтдаа жагсаалтай танилцав.
Пхеньяны олон нийт баярын хувцас өмсөж, далбаа, цэцэг болон бөмбөлөг барин, БНХАУ-БНАСАУ-ын найрамдлын уриан дор уухайлан, гар даллан, алга ташиж, дарга Ши Жиньпинийг угтан авлаа.
